Wales, ïaïong:
Ki nongtrei kam sorkar hapoh Wales ki la rai ban pynlong da ka jingiakhih paidbah pyrshah ia ka sorkar ha une u Jymmang u ban wan haba iadei bad ka jingsiew lane ka tulop jong ki.
Kumta, la ong ba kitei ki nongtrei sorkar ki la pynbeit ban pynlong jing-iakhih paidbah ha ka 11 tarik u Jymmang bad kumjuh ruh ha ka 7 tarik u Jylliew hadien ba ka sorkar ka la kyntait ia ka jingdawa jong ki nongtrei ban pynkiew tulop noh da 4% na kaba ju long baroh shi katta.
U Daniel Maney, uba long u Union Negotiation Officer jong ka Wales haba ïakren bad ki lad pathai khubor ha ka sngi ba la leit, u la ong ba ki dkhot bad nongtrei baroh kim don lad shuh da kumwei ha kane ka por lait tang da kaba wanrah ia katei ka jingiakhih paidbah ban pyrta jam bad ban dawa ruh ia ka sorkar ba kan pynïoh noh ia ka hok bad jingdawa jongki.
Kane ka khubor ka long ruh hadien ba ki nongtrei Civil Servants jong ka England ki la pynbna ban pynlong da ka jingiaid kjat ha ka 10 tarik u Jymmang bad ka 7 tarik u Jylliew ha kylleng ki thaiñ ba don ki tnat sorkar. Kumjuh ruh la ong ba wat da ki nongtrei jong ka tnat Environment Agency ruh ki la dep ban sdang ia ka jingiakhih ba 3 sngi jongki haba iadei bad ki mat jingdawa ba kongsan jong ki.
