Nongstoiñ, Ïaïong 19:
Ka shlem trei kam jong ka District Sports Officer (DSO), West Khasi Hills ka la plie pyrda ïa ka lympung ïalehkai 28th Chief Minister District Level Inter School Athletic Meet 2023 ha kaba la wan shim bynta da 26 tylli ki skul na kylleng ki jaka jong kane ka district.
Ïa katei ka lympung la pynlong ha madan NDSA, Nongpyndeng ha kaba ka Dr. S.A Lyngdoh, District Medical Health Officer, WKH ka la long kum ka kongsan ha ka jingdonlang ruh ka DSO Kong Balarina Syiem, ki nonghikai na ki skul bapher bapher bad kiwei kiwei.
Ha kane ka lympung ïalehkai la phiah ha ki lai tylli ki kyrdan ïalehkai na ka bynta ki khynnah shynrang bad kynthei, kita ka Under-18, Under-16 bad ka Under-14. Nalor kata ki don kumba 23 tylli ki jait jingïalehkai kiba kynthup naduh ka 100 meter race, Shot Put, Discuss Throw, Javelin Throw, Long Jump, High Jump bad kiwei kiwei.
