Shillong, Ïaïong 19:
Saw na ki san ngut ki MLA ka All India Trinamool Congress (AITC) hapoh ka jingïalam u Dr. Mukul Sangma ki lah ban leit ban pynïasoh noh bad ka seng Bharatiya Jana Party (BJP) ha kine ki sngi ban wan.
Katkum ki khubor kiba la ïoh lum, la ïathuh ba ka jingslem ban pynïasoh sha ka seng BJP ka lah ban dei namar u President ka TMC Meghalaya, u Bah Charles Pyngrope, um treh ban leit lang bad kiwei pat ki MLA ban ïasnoh bad kane ka seng (BJP).
Ki khubor kiba ïajan bha na ka seng TMC bad na ka BJP ki la ïathuh ba kane ka jingthmu ban leit pynïasoh sha ka seng BJP ka dang don hapdeng ka jingïakren bad ki nongïalam ka BJP ha Meghalaya. Nangta ka lah ban don ruh ka jingïapynbeit bad u Convenor ka North East Democratic Alliance (NEDA) uba dei ruh u Myntri Rangbah ka jylla Assam, u Himanta Biswa Sarma, bad ki nongïalam ka BJP ha Delhi kum u JP Nadda, Amit Shah bad u Narendra Modi.
Ki MLA ka TMC kiba jop ha kane ka ilekshon ki long san ngut kiba kynthup ïa u Dr. Mukul Sangma uba dei u Myntri Rangbah barim ka jylla, u Bah Charles Pyngrope uba dei Lamphang barim ka Ïingdorbar Thawaiñ ka jylla, ka Miani D Shira kaba dei khun jong u Dr. Mukul Sangma, u Rupa M. Marak, bad u Dr. Mizanur Rahman Kazi.
Ki khubor ki ïathuh ba ka jingthmu jong ki saw ngut ki MLA ka TMC ban rung noh sha ka seng BJP ka long namar ka dei ka seng kaba synroplang ha ka sorkar jylla bad ka dei ka seng kaba bat ïa ka bor synshar ha ka ri India hapoh ka jingïalam u Narendra Modi.
Haba pyrshang ban ïakren bad u Bah Charles, uba dei u President ka TMC Meghalaya, ym shym la ïoh satia.
Ki khubor ki ïathuh ba kane ka jingïakren ka lah ban kham shim por namar kin don ki nongkitkam ka TMC ki bym kwah ban leit pynïasoh sha ka seng BJP, hynrei la sngewthuh ba lada ki saw ngut ki MLA ki lah ban shim ïa ka rai kan nym don shuh ka jingpyrkhing hapoh ka aiñ kyntiap seng.
Kum ban shu pynkynmaw ha kine ki taïew ka la mih ruh ka khubor ba ki ar ngut ki MLA ka PDF ki lah ban leit pynïasoh noh sha ka seng NPP kaba ïalam ïa ka sorkar jylla, hynrei kine ki MLA kin sa pynsngew ha ka Central Executive Committee (CEC) shwa ban shim ïa ka rai kaba khatduh.
Kum ban shu pynkynmaw u Dr. Mukul Sangma u la mih ryngkat ki 12 ngut ki MLA Congress ban pynïasoh sha ka seng TMC. Hynrei na kine ki 12 ngut, kumba 4 ngut ki la mih noh na kane ka seng ban rung sha kiwei pat ki seng saiñpyrthei.
Hadien ka ilekshon, ka TMC kaba la jop tang 5 ngut ki MLA, ka la hap ban shong biang ha ka liang pyrshah hynrei u Dr. Mukul Sangma um shym la ïoh shuh ban long kum u nongïalam ka Liang Pyrshah. Kat haduh mynta, kane ka shuki nongïalam Liang Pyrshah ka dang sah thylli namar u Lamphang ka Ïingdorbar Thawaiñ um pat ai ïa kano-kano ka rai.
