Poland, Iaïong:
Uwei u nong Britain u la khlad noh hadien ba u la dih haduh 22 klat ka kyiad ba long bih hapoh ki 90 minit katba u dang shong ha ka jaka leh sngewbha (Club) ha Poland.
Ia utei u briew la ithuh kum u Mark C bad u la don 36 snem ka rta, hynrei la ong ba u Marc C u la buaid lypa naduh ka por ba u leit poi ha katei ka Wild Night Club kaba don ha Krakow ha ryngkat bad ki paralok jong u. La ong ba utei u briew u don hapoh Poland kum u riew shangkhai ha ryngkat bad uwei u paralok jong u bad la ong ba kitei ki ar ngut ki poi leit rung hapoh jong katei ka jaka lehkmen namar ba ki tip ba ha katei ka sngi ki pyllait ei ka bai rung.
Katkum ki khubor, la ong ba u Mark u la pyrshang hi katba lah ban tehlakam ia ka jingbuaid da kaba kyntait ruh ban dih bun. Watla katta, la ong ba ki dkhot bad ki nongtrei jong katei ka jaka ki la pynbor ia u ba un nang dih shi dih tad haduh ba un da ioh ban dih ia 2 klat ka kyiad ba khlaiñ hashwa ba un kyllon noh syndon bad khlad noh ruh tang hadien khyndiat por. Hadien ka jingkyllon jong u ha katei ka miet, ki nongtrei jong katei ka jaka leh kmen ki la tuh ia ka pisa kaba u don baroh kumba 2,200 da ka pisa Poland bad kumba (Rs. 42,816) kaba u don ha ka met jong u ha katei ka sngi.
Ki bor pyniaid ka Poland, ki la iathuh ba ka jingkhlad jong u kam dei namar ka jingkhleh bih ne jingai bih na katei ka jaka leh kmen, hynrei namar ka jingdih palat jong u ia ki kyiad kiba khlaiñ ka la pynlong ia ka met jong u ba kan ym lah shuh ban tehlakam ia ki jingkhleh na kitei ki kyiad kiba u la dih.
Katei ka jingjia ka la jia naduh u snem 2017, hynrei la ong ba ki pulit ka Poland ki dang shu dep kem shen ia 58 ngut ki briew kiba don kti ha kum kitei ki jait kam ban pynngop tang ban ioh lute haba iadei bad ka jingiap jong utei u riew shangkai pyrthei ha katei ka por. ki pulit ki la pynngat ruh palat 700 tylli ki kyndon pynkheiñ aiñ pyrshah ia kitei kiba don kti bad kiba la ioh kem baroh bad kane ka long ruh hadien ba ki la leit ban bud dien bad peit thuh ha kiwei kiwei ruh ki jaka leh kmen kiba pher kiba don ha kylleng ka ri.
Ka Central Police Investigation Bureau (CBSP) jong ka Poland ka la iathuh ba bun kum kitei ki jaka leh kmen, ki ju pynngop bad riam ia kito ki bym pat ju kham poi sha kitei ki jaka da kaba pyndih jubor bad pynbuaid ia ki nongleit rung ha katei ka jaka leh kmen khnang ba kin ioh ban tuh ia kat ka pisa bad ki jingdon- jingem ba ki rah sha katei ka jaka. Namar la ong ba kitei ki jaka ki ju shim kabu ruh ia ki nongleit dih ha ka por ba kim tip briew shuh wat haba kitei ki nongdih ki ju siew pisa ha ka por ba la dep dih.
Katkum ka NHS, la ong ba ka kyiad ka lah ban kylla ne long bih noh hadien ba la dih khlem sangeh ia ka kyiad haduh ba ka met kam lah shuh ban shim bad pyntreikam ia kaba u briew u dih. Kumta ruh la ong ba dei ha kum katei ka por ba ki briew kin sa kem pang bad ki donkam ban ioh ia ki jingsumar ba kyrkieh.
