Jowai, Ïaïong 19:
Ka Voice of People Party (VPP) kan nym salia ban shim da ki lad jingïakhih lada ka sorkar MDA kam pynkylla noh mardor ïa ka Meghalaya State Reservation Policy, la ong u President ka VPP bad u MLA ka Nongkrem u Bah Ardent M Basaïawmoit.
U Bah Ardent u la byrthen ïa ka sorkar MDA ha ka jingïalang paidbah ba la pynlong da ka VPP ha Ïawmusiang Jowai ha ka sngi Balang.
U President ka VPP u la ong ba ka seng ka dawa ïa ka sorkar MDA ba ka dei ban thaw ïa ka Expert Committee ban pynkylla noh ïa ka Reservation Policy bad ban pynsangeh noh ïa ka jingthung kam thung jam katkum ka Roster System jong ka Reservation Policy kaba mynta.
Ka Jaiñtia Hills ka la ju sei mynshwa ïa ki ’riew khraw pyrkhat ki ’riew proh jabieng kum ki jong u Dr Baristar Pakem, John Deng Pohrmen bad kiba bun ki nongïalam ba stad ba khraw jong ka Jaiñtia Hills, u Bah Ardent u la bynñiaw mynta pat ki sei ïa kiba kum kine ki nongïalam ki bym lait ban ang hapoh ka ïingdorbar thawaiñ.
“Balei ba phi shu ïa lalot pisa lut, kwah tang ka bam ei lada phi sngewthuh ba phi kwah ïa ka lawei kaba phyrnai, kane ka dei ka por ba phin rai ba ha Jaiñtia Hills yn ym ailad shuh ïa ki heh spah ba kin synshar ïa phi,” la ong u Bah Ardent.
U la ong, “Ki heh spah kim shakri ïa ki paidbah hynrei ki shong ha ka bor tang ban pynkhlaiñ ïa ka kamai kajih jong ki, ki knieh lut ïa ka kam ka jam ka jong nga ka jong phi bad ha ka jaka ban trei surok ma nga bad ma phi la ïoh tang ka Dhar Company namar ba ka synshar hapoh Secretariat.”
U la kren ruh halor ka jingduh tulop ki nonghikai bad jingbym ïoh jaka bret ñiut ka Jowai, “Ban siew tulop ïa ki nonghikai bad ban pynïoh ïa ka jaka theh ñiut ïa ka Jowai ym lah ban pynïoh, hynrei ka sorkar ka don pisa pat ban thung Chairman thung Adviser ïa kiba rem ha ka ilekshon MLA.
U la ong ba kane ka dei tang ka buit ban bam ei san snem, katba ïa ki nongtrei sorkar, ki nonghikai ka hok lajong kaba ki la trei shitom kim ïoh, ki nongrep ki shah lehbeiñ, ka khaïi pateng ka hiar bad u dewïong ym don ba pyrkhat ban plie khnang ban im namar ba la ïaid ïew ka high level.
U la ong ba U Blei u la sei ïa ka VPP ha ka por kaba biang eh kata ban pyntylli ïa ka jaidbynriew bad ban pynduh ïa ka bam sap bam duh bad ban pynduh ïa ka kam lehbor jong ki nongsynshar bad ban wanrah bad pynphai biang sha u paidbah uba long u tynrai jong ka bor.
