Jowai, Ïaïong 19:
Ka shnong Khanduli ka hap hapoh u pud u sam jong ka West Karbi Anglong District (WKAD) katkum ki kot ki sla bad ki ‘map’ ba don bad ka Sorkar Assam, la ong ka Deputy Commissioner jong ka West Karbi Anglong District ka Krishna Baruah.
Ïa kane la ïathuh da ka Baruah haba ïakren bad ki lad pathai khubor hadien ba la wai ka jingïalang ki khlieh nongsynshar jong ar tylli district; ka West Jaiñtia Hills District bad West Karbi Anglong District ha shlem treikam DC Jowai ha Sngi Balang.
Ka shnong Khanduli kaba hap ha Namdong C&RD Block bad Saitsama Outpost ka long kawei na ka jaka ïakajia khappud hapdeng ka Meghalaya bad Assam.
Dang ha ka Lah Sngi U Blei ka la don ka jingïakynad kaba jur haba ki nongshong shnong ka Khanduli ki la pynpra ïa ka signboard ba la sieh da ka Karbi Anglong Autonomous Council (KAAC) kum ka dak ka jingpyrshah kaba jur ïa ka jingbuh khyrdop lum khajna ha Khanduli.
Halor ka jingwan buh khyrdop da ka KAAC ha Khanduli, ka Deputy Commissioner jong ka West Karbi Anglong District ka la ong, “Ka KAAC ka rukom treikam ka long kaba laitluid kumta kam ju ïathuh ïa ngi haba ki pyntreikam kino kino ki skhim ha ki thaiñ khappud hynrei mynta ngin pynsngew ïa ka KAAC ba ka dei ban pyntip sha ngi khnang ngin lah ban pyntip pateng sha ki bor pynïaid district ka West Jaintia Hills ban lait na kino kino ki jingjia jingïakynad.”
