Shillong, Ïaïong 19:
U nongïalam ka UDP, u Bah Paul Lyngdoh u la ong ba ïa ka mat ban pynbeit ïa ka Reservation Policy la pynrung ha ka mat treikam jong ka UDP, hynrei ka seng ka jop tang 11 ngut; kaba pyni ba tang na Khasi Jaiñtia ki paidbah na ki 25 tylli ki konstitwensi kim mon ban pynbeit ïa kane ka mat ïa ïoh bhah ha Jylla.
U Bah Paul u la pynpaw ïa kane haba kylli halor ka jingdawa ban pynbeit biang ïa ka bhah thungkam ka Jylla kaba long mar 40 na ka 100 ïa ki Khasi Jaiñtia bad 40 na ka 100 ïa ki Garo.
Haba kylli halor ka jingdawa ban ktait bad pynbeit ïa ka Reservation Policy, u Bah Paul u la ong ba ym lah ban len ba kane ka don ka jingbakla naduh basdang ïa ka Reservation Policy, namar kumno la shu shah ban ap haduh 2 ne 3 snem ban pyndap ïa ki kam kiba lait, kaba long kum ka jingpeit poh ïa ka jingkhlaiñ jong ka rukom treikam ka Sorkar namar ki nongtrei kin duna ba hap ban ap haduh 2 ne 3 snem ban pyndap ïa ki jaka ba thylli.
U la ong ba kane ka mat ka dei kaba la ïaid la 50 snem, kumno yn lah ban pynbeit noh tang 5 sngi, lane 5 taïew ne wat 5 bnai, tangba hap ban pynbeit jai pa jai.
Haba kubur ba don ki jingdkoh ha ka Policy, u la ai nuksa ba lada donkam thung kumba 12 ngut ki nongtrei, hynrei tang namar ba hap ap 2 ne 3 snem, ka mut ba kata ka tnat treikam ka duna nongtrei haduh 2 ne 3 snem.
Haba kylli la ka don jingma lada ktah mynta ïa ka reservation policy ban pynbeit thymmai, u Bah Paul u kubur ba ka jingma bad u la kyntu ïa baroh ban phikir namar ym dei ban kut ha kaba siat ïa ka pungkjat lajong, bad pynmynsaw dalade.
Une u nongïalam ka UDP ha kawei pat ka liang u la ong ba ka UDP ka la dep buh ha ka mat kular ilekshon ban pynbeit ïa ka reservation policy, bad pynïakhun 46 ngut ki kyrtong.
Hynrei u la ong ba ka UDP ka jop tang 11 ngut bad lada pyrkhat tang ïa ki konstitwensi ha Khasi Jaiñtia, ki don 36 tylli, ka UDP ka jop tang 11 na ki 36 tylli ki konstitwensi, khlem ñiew ïa ki 10 tylli ki konstitwensi ba ka UDP ka ïakhun ha Garo Hills.
“Kane ka pyni ba kiba bun ha ki konstitwensi kim sngew mon ïa ka jingkular ka UDP ban pynbeit ïa ka reservation policy. Kamut ba ki 25 tylli ki konstitwensi kim kwah ban pynkylla ïa ka reservation policy. Wat lada pynwan lang ïa ka UDP 11 ngut bad ka VPP 4 ngut, ka dang long tang 15 ngut, kaba mut ba 15 na ki 36 tylli ki konstitwensi kim pat kot,” la bynrap u Bah Paul.
Lah ban kdew ba ka VPP ka dawa ban pynkhih ïa ka Reservation Policy bad ka pdiang ïa ka Roster System namar ka ong ba ka jingeh ka don ha ka Reservation Policy ym ha ka Roster System. Ka VPP ka shu dawa ban buhteng ïa ka roster system katba dang ap ban pynbeit ïa ka Reservation Policy.
