Nongpoh, Ïaïong 19:
Ka Synjuk Ki Rangbah Shnong (SKRS) Ri Bhoi District ha ka jingïalang kaba la pynlong ha ka Sngi Balang ha Umsning Auditorium da kawei ka jingmut ka la shim ïa ka rai ban pyrshah beit ïa ka hukum jong ka Khasi Hills Autonomous District Council (KHADC) ban khang lad ïa ki ban ïashim bynta halor ki kam saiñ hima sima.
Halor kane ka bynta, na ka liang ka synjuk shen kan sa leit ruh ban kynduh ïa u Chief Executive Member ka KHADC ban ïakren bad pynsngew halor ka rai kaba ka synjuk ka la shim.
U Bah PB Sylliang, General Secretary ka SKRS, u la ong ba ka hukum ba la pynmih da ka KHADC ha ka 4 tarik u Ïaïong ka la wanrah ïa ka jingkulmar jingmut hapdeng ki Rangbah Shnong naba ha katei ka hukum la thoh ruh ïa ka kyntien ‘Headmen’ nalor ka kyntien Rangbah Shnong. Kumta na ka liang ka synjuk kan sa leit ban kynduh ïa u Executive Member ba dei khmih ïa ka tnat Elaka jong ka KHADC ban ïoh jingshai halor kane ka bynta.
Nalor nangta, u la pynkynmaw ruh ïa ka jingkhih phaloh ha ka jylla ha u snem ba la dep halor ka jingkhang lad jong ka sorkar jylla ïa ki nonghikai ban ïashim bynta ha ka saiñ hima sima, ha kaba ki nonghikai ki la leit ban ïakhun pyrshah ïa kane ka hukum jong ka sorkar jylla. Ka ïingbishar kaba la rai jop bad ailad ïa ki ba kin shim bynta ha ka saiñ hima sima.
U la ong ruh ba lada ki nonghikai kiba la siew tulop da ka sorkar ki dang ïoh ban ïashim bynta ha ka rynsan saiñ hima sima kumba la pynksan da ka ïingbishar. Balei yn khanglad ïa ki Rangbah Shnong ban ïashim bynta ha ka saiñ hima nalor ba ki dei kiba trei mon sngewbha bad khlem jingsiew la ka dei na ka sorkar ne ka KHADC.
Shuh shuh u Bah PB Sylliang u la ong ruh ba lada ka long ha kane ka rukom, wat ki MDC ruh ki dei ban iehnoh shwa (resign) na ka jinglong MDC hashwa ba kin ïakhun ïa ka ilekshon MLA naba ki dei kiba la siew tulop da ka KHADC bad ruh khamtam ba ki dei kiba khmih na ka bynta ban ïada ïa ka riti ka dustur bad ka khyndew ka shyiap jong ka jaidbynriew.
Na ka liang ka SKRS ka la byrthen ruh ban shim ïa ki sienjam ban leit tied jingkhang jong ka ïingbishar kumba la leh da ki nonghikai lada ka KHADC kam pynbeit mardor ïa kane ka hukum ban ïoh ïa ka jingbishar kaba hok.
Halor ka jingrem kaba palat pud ban pynrung kyrteng ïa ki jaka ki puta bad ka tnat Revenue jong ka jylla, na ka liang ka SKRS ka la shim ruh ïa ka rai ban leit kynduh ïa u Myntri ba dei khmih ïa ka tnat Revenue ka sorkar jylla ban ïakren bad kyntu ba un shim ïa ki lad ki lynti ban khmih bniah na ka bynta ban pynduna ïa ka bai pynrung kyrteng jaka kaba la wanrah jingeh ïa kiba bun ki paidbah.
U Bah Sylliang u la ong ba kumba long mynta bun na ki paidbah ki ju leit ruh ban pynrung kyrteng ïa la ki jaka ki puta hapoh ka KHADC ha ka dor kaba rit. Hynrei, kaba sngewsih ka long ba ki tnat treikam sorkar bad ki bank lane kita ki ‘financial institution’ kim ju pdiang satia ïa ki kot jaka puta kiba pynrung kyrteng bad ka KHADC. Halor kane ka mat ruh, na ka liang ka SKRS ka la shim ïa ka rai ban leit kynduh ïa u EM ka KHADC ba dei khmih ïa ka tnat Elaka bad Revenue ban ïoh jingshai balei ki tnat treikam sorkar bad ki bank kim pdiang ïa ki kot jaka puta ba la pynrung kyrteng bad ka KHADC.
Ha kaba ïadei bad ka jingpynbeit ïa u pud u sam bad ka jylla Assam ha ka wat ba ar, na ka liang ka SKRS ka la rai ban kyrshan beit ïa ki Rangbah Shnong jong ki shnong khappud bad ha shwa ba ki Regional Committee jong ka jylla Meghalaya bad Assam kin shong pyrkhat. Na ka liang ka SKRS shen kan sa leit ban kynduh ïa ki Rangbah Shnong bad nongshong shnong jong 22 tylli ki shnong khappud ka thaiñ Block II bad dawa ruh ba kine ki shnong kin dei beit ban hap hapoh ka jylla Meghalaya. Lada ka sorkar ka ïaid shakhmat ban aiti ïa kine ki 22 tylli ki shnong sha ka jylla Assam, na ka liang ka SKRS kan pynlong da ki jingïakhih kiba tyngeh.
Sa kawei ka mat kaba na ka liang ka SKRS ka la ïakren ha kane ka jingïalang ka dei halor ka jingshah ktah ki paidbah na ka jingpynlip bording ilektrik hapoh ka district khamtam ha ki por mynsngi bad janmiet kaba la buh jingeh shikatdei ïa ki paidbah bad khamtam eh ïa ki samla pule. Halor kane ka bynta, na ka liang ka SKRS ka la rai ban leit kynduh ïa u CEO ka Umïam Division jong ka MeECL ban ïakren bad dawa ban pynjynsur ïa ka rukom pynlip ïa ka bording ilektrik hapoh ka district.
