Shillong Ïaïong 19:
U MP ka Shillong, u Bah Vincent H Pala u la phah jingthoh sha u Myntri Rangbahduh ka ri, u Narendra Modi bad u la kyrpad ïa ka jingkyrshan ka Sorkar Pdeng ban shna ïa kawei ka surok kaba heh ka ban pynïasoh hapdeng ka Meghalaya bad Assam. Ïa kane ka surok la ai kyrteng kum ka surok Umtyra-Semasi-Nohkhara na East Jaiñtia Hills ha Meghalaya sha Lubang ha Karbi Anglong, Assam.
Ka jingjrong kane ka surok ka long kumba 40 kilometer ha kaba yn donkam ban shna ïa ka jingkieng lyngba ka Wah Kupli. Kane ka surok kan pynïasoh ïa baroh ar tylli ki Jylla ka ban ïarap ruh ban kyntiew ïa kiba treikam lajong.
U Bah Pala u la ong ba kane ka surok kan pynlyngkot kumba 130 km haba leit jingleit bad pynsuk ïa ki paidbah jong baroh ar tylli ki Jylla Meghalaya bad Assam.
La ong ba kane ka surok kan ïasoh bad ka surokbah (National Highway-6) ha Meghalaya bad ka surokbah (National Highway-127) ha Assam.
Ha ka shithi sha u Modi, u Bah Pala, uba dei ruh u Secretary General ka North East MP Forum (NEMPF) u la ong ba ka surokbah-6 khamtam ha Sonapur ka dei ka jaka ba ju jia ka jingtwa kaba shyrkhei ha ka slap, kaba ju pynthut ïa ka leit ka wan ha ka thaiñ hapdeng ka Meghalaya bad ka Assam bad kiwei ki Jylla ka Thaiñ Shatei Lam Mihngi.
U Bah Pala u la ong ruh ba kane ka surok bad jingkieng ha Wah Kupli kan long ka jingïarap ïa ki briew kiba leit sha Assam ha thaiñ Barak valley, Mizoram, Tripura, bad Nagaland khamtam ha ka por ba jur slap.
U la ong ba kane ka surok kan pynsuk ruh haba pynkut ïa ki marpohkhyndew kum u dewïong, mawshun, timber, bad kane kan kyntiew ïa ka kam khaïi ki briew na Meghalaya bad Assam. Kane ka surok kan pynïasoh ïa ka Karbi Anglong ha Assam bad ka kad khaïi (Land Customs Station) bad ruh bad ka ri Bangladesh lyngba ka Meghalaya.
Une u MP ka Shillong u la ong ruh ba ka surok Umtyra-Semasi-Nohkhara ha East Jaiñtia Hills, Meghalaya sha Lubang ha Karbi Anglong ha Assam kan ai jingmyntoi ym tang ban kyntiew ïa ka ïoh ka kot, hynrei kan kyntiew ruh ïa ki kam jngohkai na ka bynta briew ka Rilum Jaiñtia bad Karbi Anglong Districts, namarba ki dei ki jaka ba bnanam ïa ka jingitynnat jong ki kshaid.
Shuh shuh, u Bah Pala u la ong ba ka jingdon kane ka surok kan long ka lad ïohkam ïa ki samla bad pynjan ïa ki briew jong baroh ar tylli ki Jylla.
Kumta une u MP ka Shillong u la kyrpad ïa u Myntri Rangbahduh ka ri ban bthah ïa ka tnat ba dei khmih ban pynkhreh ïa ka DPR bad shim ïa kane ka projek kaba hakhmat eh ha ka rukom pynwandur bad bad pyntreikam na ka National Highway Fund, namar kane ka surok kan ïasoh ïa ki ar tylli ki surokbah nong ar tylli ki Jylla bad ïa ki jaka khaïi ha khappud bad ka Bangladesh.
