Shillong, Ïaïong 19:
U Javed Sohtun u la long tang marwei napdeng ki nongïalehkai Power Lifting uba la shah jied ban leit ïashim bynta ha ka NPC Junior Senior Open Men Category Power Lifting ha Dimapur kaba ha Nagaland.
Une u nongïalehkai u dei na ka shnong Lumparing bad uba ju ïalehkai na ka Meghalaya Power Lifting, u la long tang marwei na ka jylla ban leit ïashim ha katei ka jingïakob ka ban long ha ka 21 bad 22 tarik mynta u bnai.
Ka jingshah jied jong utei u rangïalehkai ka la wan hadien ba u lah ban khur ïa ka takma ksiar ha ka 3rd State Bench Press Competition kaba la long ha u snem 2022 ha Umsning, Ri Bhoi District. U Javed u la ïashim bynta ha kiba bun ki jingïakob kiba la long shabar jylla kum ha Guwahati, Delhi, Goa, Uttarakhand bad kiwei.
Haba ïakren ba u nongthoh khubor, u Javed u la pynpaw ba kane ka jingshah jied ka dei lyngba ka jingïoh khur ïa ka takma ksiar ha ka State Level Bench Press Competition kaba la long ha Umsning. “Nga ïalehkai ha ka heavy weight (78-83kg). Nga shait rah bench press 150kilo, ka jingkilan met jong nga ka dei 120kilo bad ïa ka super set nga ïalehkai ha ka 150-155kilo.”
“Hashwa ba ngin shah jied ban leit ïalehkai shabar, ngi dei ban ïalehkai shwa ha ka State Level bad dei tang kito kiba khur ïa ka takma ksiar kiba shah jied ban leit ïashim bynta shabar.
Haba kylli halor ka jinglut jingsep na ka bynta ban leit ïashim bynta shabar, u Javed u la pynpaw ba ym lah ban len ba na ka liang ka sorkar ka kloi ban ai jingïarap. “Hooid, ngi ju ïoh jingïarap na ka sorkar haba ngi leit ïashim bynta shabar, hynrei ngi hap ban pynlut hi nadong shadong ïa ki jingdonkam jong ngi naduh ki jingbam kiba tei bad ki long kiba rem bha.”
Une u rangïalehkai u dei uba ïashim bynta ha ka Body Building, hynrei mynta u la kynriah noh sha ka Power Lifting. “Kum ki nongïalehkai ngim don ïa ki coach, hynrei ngi hap ban shu peit hi lyngba ki video kumno ban kilan met ïalade. Kiwei ki jylla ki don lut nadong shadong naduh ki physio therapy, ki coach bad kiwei, hynrei kaba sngewsih ka long ba ngim don bad ngi hap leh hi, ngi hap long coach hi dalade ïalade.”
“Kane ka jingïalehkai ka ïarap bha ïa ngi ba ngin lait na ki jingsniew kiba laiphew jait bad nga pynshlur ïa kiwei ki khynnah ki samla ba kin ïashim bynta ha kane ka jingïalehkai da ka mynsiem kaba long ïai shah khnang ba ki lah ban kynjoh sha ka thong,” u la bynrap biang shwa ba un mih na ka nongbah ha ka Sngi Palei ban leit sha Nagaland.
