Jowai, Ïaïong 19:
Ki bor pynïaid district jong ar tylli ki district, kita ka West Jaiñtia Hills bad ka West Karbi Anglong ki la mynjur ban kyntu ïa ka Karbi Anglong Autonomous Council (KAAC) ban pynkynriah noh ïa ka khyrdop jong ka tnat khajna kaba don ha Khanduli sha ka jaka bym pyrshah shuh ka Dorbar Shnong Khanduli.
Ïa kane ka rai la shim ha ka jingïalang jong ki khlieh nongsynshar jong kitei ar tylli ki district kaba la long ha kamra jingïalang jong ka shlem treikam DC Jowai ha ka Sngi Balang mynta ka taïew.
Na ka liang ka West Jaiñtia Hills District la mihkhmat da u Deputy Commissioner u BS Sohliya, IAS ryngkat u Superintendent of Police u C. Syrti, u Deputy CEM ka JHADC bad ki MDC ka JHADC. Katba na ka West Karbi Anglong Assam la mihkhmat da ka Deputy Commissioner ka Krishna Baruah bad u Superintendent of Police u Indranil Baruah.
Haba ïakren bad u Bah Sohliya hadien ba la wai ka jingïalang u la ïathuh ha kane ka jingïakynduh na baroh arliang ki la rai ban ïatreilang ryngkat ban pynneh ïa ka shongsuk shongsaiñ ha ki shnong khappud ka Meghalaya bad Assam.
Shuh shuh u la ïathuh ba la rai ruh haba don kino kino ki jingpyntrei thymmai dei ban ai jingtip mar kylliang.
Halor ka jingïakynad ha ka shnong Khanduli na ka daw ka jingwan buh khyrdop ka KAAC, u DC ka West Jaiñtia Hills District u la ïathuh ba ka jingïalang ka la mynjur ba ka Deputy Commissioner West Karbi Anglong kan kyntu ïa ka Karbi Anglong Autonomous Council (KAAC) ban pynkynriah noh ïa ka khyrdop jong ka tnat khajna kaba don ha Khanduli sha ka jaka bym pyrshah shuh da ka Dorbar Shnong Khanduli.
Kane ka jingïakynduh lang ka dei hadien ba la mih ka jingjia kyntur pud kyntur sam ha ki thaiñ khappud jong ka West Jaiñtia Hills District bad West Karbi Anglong District.
Kum ban shu pynkynmaw ha ka 15 tarik mynta u bnai, ka Karbi Anglong Autonomous Council (KAAC) ka la sieh jubor ïa ka signboard hapoh u pud u sam jong ka Dorbar Shnong Khanduli na bynta ban khrong khajna ïa ki kali kit mar rep jong ki nongshong shnong ka Khanduli.
Ki nongshong shnong kiba la bitar lep halor kane ka jingleh bor jong ka KAAC ki la leit pynpra ïa katei ka signboard ha ka 17 tarik. Nangta ka la mih ruh ka jingïapyni bor bad ka thma ktien kaba jur hapdeng ki nongshong shnong ka Assam bad ki nongshong shnong ka Meghalaya.
