Los Angeles:
Ka PETA ka la phah jingthoh sha ki nongpyniaid ka Met Gala ban khanglad ia ki nongwan shim bynta ha katei ka tamasa ban phong ia ki riam ki beit kiba la shna na ki snieh bad shñiuh mrad ha kaba man la u snem ki dkhot ka PETA ki ju lap ba ki nongwan shim bynta sha ka Met Gala ki ju sngewtynnad ban phong ia ki riam kiba la shna na ki snieh mrad kaba la khang pyrshah.
Hadien kane ka jingphah jingtip jong ka PETA ka Anna Wintour lem bad ki katto katne ki nongpeit bad nongpyniaid jong ka Met Gala mynta u snem ki la dep ban ai jingthoh sha kito kiba la shah khot sngewbha ba ki dei ban kiar na ka ban phong ia kino kino ki riam kiba dei kiba la shna na ki snieh mrad bad kumjuh ruh na ki shñiuh.
Ka Anna Wintour kaba long ka Editor in Chief jong ka Voque ka la shim khia shi sha ha kane ka kynti ba mynta ban mana bad ma ham ba ym bit ban wan phong ia kino kino ki riam kiba la pyrshah bad la da lap ia kito kiba iaid lait ia kaei kaba la mana ki dkh ot ka PETA kin shim khia ban ai jing sneng.
Ha ki snem ba la leit la sakhi ba bun ki nongwan shim bynta sha ka Met Gala ki la wan phong ia ki riam kiba la shna na ki snieh mrad, sner jong ki Ostrich bad kumjuh ruh na ki snieh bseiñ bad tang namar kane la hap ban pyniap haduh spah tylli ki mrad.
Na ka bynta ban teh lakam ia ka jingpyniap beaiñ ia ki mrad bad ha kajuh ka por ia ki sim ka PETA ka la phah jingtip sha ki bor ba dei peit ka Met Gala ba ki dei ban khang pyrshah ia nongwan shim bynta ba kim bit ban phong ia kino kino ki riam kiba la dep khang.
La iathuh ba ha ki snem ba la leit bun ki nongwan shim bynta sha ka Met Gala kim salia ban siew ia ka dor kaba heh na ka bynta kino kino ki riam kiba la shna na ki snieh ne shniuh mrad tang ban pynphuh pynphieng ialade bad ban itynnad sha katei ka jingleit shim bynta.
Mynta u snem ka theme jong ka Met Gala ka dei “In honour of Karl”, uwei na ki nongpynwan jaiñ uba la khad noh ha u 2018 bad uba la don 85 snem.
