Shillong, Ïaïong 19:
U MLA ka VPP na North-Shillong, Bah Adelbert Nongrum u la ong ba ka Sorkar ka dei ban hukum ïa ki pulit ka Jylla ban long ki nongïada ïa ka hok ha ki jaka khappud khnang ba ki nongshong shnong kin im ha ka shong suk shong shngaiñ.
“Ka Sorkar ka donkam ban pynkhlaiñ ïa ki pulit bad ban pynbiang sha ki ym tang ki suloi-ki kuli, hynrei ban ai ruh ïa ka bor bad ka hukum ba kin long shisha ki nongïada ïa ka hok haba ïadei bad ka khyndew. Da lei-lei ym dei ban shah tam ïa u pud bad ki pulit lada ka por ka dawa, ki dei ban pynbud ruh ïa ka nuksa jong ka Mizoram khnang ba ki briew jong ngi kim dei shuh ban shah pyndik, pynsyier ne shah pynjynjar,” la ong u Bah Nongrum.
U la ong ba ki pulit ki dei ruh ban ai ka jingïada ïa ki mynsiem briew khnang ba ki jingjia kiba la jia ha ki por ba la leit kin ym jia shuh ha kaba la shu duh ei noh ïa ki mynsiem ba lui-lui namar ka jingtlot jong ka Sorkar bad ki briew jong ka aiñ.
“Katba dang ïaid ka kylla ba-ar jong ka jingïakren pynbeit pud hapdeng ka Assam bad Meghalaya, nga kyntu jur ïa ka Sorkar ba ka dei ban pynbiang ki jingdonkam ha baroh ki bynta jong ka khappud ban skhem ban ban shngaiñ ki nongshong shnong ha baroh ki bynta lyngba ka roi ka par la ha ka koit ka khiah, pule-puthi, khaïi-pateng khnang ba kan don ka jingsngew trai la ka jaka ka puta bad ka khyndew ka shyiap. Ka jaka ka dei kum ka jingim, shisien ba ngi duh ngin ym ïoh shuh ar sien,” la ong biang utei u MLA.
Shuh shuh u la bynrap, “Ngam tip haduh katno ngi dang lah ban shaniah ha ka jingïapynbeit pud hapdeng kine ki 2 tylli Jylla. Kum ban shu pynkynmaw, ha ka kylla banyngkong, ki jaka kiba don ha Khanapara ki bym don ka jingïakajia…ka Sorkar Meghalaya ka la ai ei sha Assam bad kane kan pynlyngngoh ba balei ka jaka bym don jingïakajia la hap ban ai ei sha ka Assam.”
