Manchester, ïaïong:
Katkum ka khubor ba la ioh lum ka iathuh ba ka Manchester City ka la dep ban phah ia ka aplikeshon ha kaba iadei bad ka jingthmu jong katei ka klob ialehkai phutbol na Bilat na ka bynta ba kan nang iai pynheh shuh shuh ia ka jaka shong peitkai ha Etihad Stadium kata sha palat ka 60,000 ngut ki jaka shong ban ngiam briew. Kane kan pynlong ruh ia ka madan ialehkai kaba lai na ka jing- heh bad bun tam ki jaka shong paidbah ha ka lympung ialehkai EPL hadien ka Manchester United bad Tottenham.
Katei ka madan ialehkai jong ka Man City ka long kawei na ki 10 ia kaba la kynthup ha kawei na ki jingiathong jong ka hapdeng ka ri Bilat bad Ireland na ka bynta ka jingiaknieh ia ka hok ban ioh pynlong ia ka European Championship ha u snem 2028. Ha kata ka jingiathong ka pynpaw ruh ba ka Man City ka dei ban don ia ka madan ialehkai ka ban lah pynrung briew haduh 61 hajar ngut na ka bynta ka jingiaknieh pynlong ia katei ka lympung.
Kumta ha kaba iadei bad katei ka jingialeh, ka City ka iathuh ba ka don ia ka jingthmu na ka bynta ban iai kyntiew ia ka jaka shong shuh shuh sa 7,000 tylli da kaba pyniar ia ka madan ialehkai kaba don ia ki jaka shong sha ka liang shatei bad ka jingpyniar ia ka tei ka bynta kan kynthup ruh ia ka iew ba thymmai jong ka klob, Museum bad ka iing-basa kaba don 400 tylli ki jynthiah ki ban khring ia ka khaii-pateng na ka 23,500 tylli ki jaka shong ba thymmai kaba mynta ka dang don hapoh ka jingtei ia kata ka madan kaba long hajan jong katei ka madan ialehkai.
Katkum ka jingkhein antad jong katei ka klob ha kaba iadei bad katei ka jingthmu, ka long ba kan shimpor haduh lai snem ban pyndep pura ia ki kam ki jam baroh kum shibynta jong ka jingthmu ha ka ka jingpynlut ka ban kot sha ka 300 million pounds ($370 million).
Ka jingthaw jaka shong ba thymmai jong ka Man City kan kiew ruh shakhliehduh ia ka madan ialehkai jong ka Arsenal ka Emirates Stadium (60,704) bad ia ka Olympic Stadium ha London (60,000) ha ka jingpynrung bun briew tam. Ia ka kyrdan ba nyngkong ha kaba iadei bad ka jinglah ban pynrung bun briew tam ha ki madan ialehkai ka long ka klob Man United ha Old Trafford kaba la lah ban pynrung haduh 74,310 ngut ki briew katba ka Tottenham ka wan ha ka kyrdan ba-ar ha ka jinglah ban pynrung haduh 62,850 tylli ki jaka shong ha ka madan ialehkai jong ka.
