Shillong, Ïaïong 19:
Ka kynhun ki ’thei ïalehkai ka St. Anthony’s College ka la khur ïa ka nam lahduh ha ka lympung ïalehkai Seng Khasi College Invitational Basketball (Girl’s) Competition ba la pynlong da ka Seng Khasi College, kaba long kum shi bynta jong kawei na ki prokram ban rakhe ïa ka Jubili Ksiar jong kane ka shlem pule.
Ha kane ka jingïakhun phainal kaba la long ha Sngi Balang ha madan ïalehkai basketball jong kane ka shlem pule ba don ha madan Weiking, Jaïaw, ki ’thei ïalehkai jong ka St. Anthony’s ki la lah ban pynliem noh ïa ka Seng Khasi College da 36-13.
Ha kane ka lympung ki don haduh 7 tylli ki shlem pule kiba la wan ban ïashim bynta sha kane ka lympung ïalehkai kaba la neh lai sngi ïa kaba la sdang naduh ka 17 tarik.
Ha kane ka sngi la ïadon lang u General Secretary Seng Khasi Kmie u Rgh. Haines Marbaniang, u Rgh. B.S Rumnong kum u President ka Governing Body ka Seng Khasi College, nangta Principal u Bah W.B Rynjah, ki nonghikai lem bad ki khynnah pule jong ka Seng Khasi College.
Ha kaba kut ka jingïakhun, la ïoh ban sam ïa ki takma lem bad ki trophy sha baroh ar tylli ki kynhun da u kongsan bad kumjuh da u President ka Governing Body u Rgh. B.S Rumnong.
