New Delhi, ïaïong:
U nongtied ba pawkhmat mynta ha kane ka pateng ialehkai kriket jong ka kynhun ialehkai ka India u Suryakumar Yadav; uba dang iai bat biang ia ka kyrdan ba 1 ha ka pyrthei, u lah shah jied ka kyrteng jong u kum u “Leading T20 Cricketer of the Year’ ha ka bynta ba thymmai jong ka Wisden Cricketers’ Almanack 2023.
Shuh shuh ruh ka khubor ka iathuh ba ka India ka lah khur ia katei kajuh ka nam wat sa na ka kynhun ialehkai jong ki kynthei, ha kaba ka Harmanpreet Kaur ka lah kylla long mynta ka thei ialehkai Kriket ba nyngkong jong ka ri ban ioh ia ka nam ‘Cricketer of the Year’. Ha ki jingiaid lynti jong u Suryakumra Yadav ka long ba u tei u rangialehkai u lah iai pynseisoh ia ka kam ialehkai jong u ha ka aiom ialehkai T20Is ha u snem 2022, ha kaba u la lah ban kamai haduh 1164 ron baroh ha ka strike rate kaba 187.43 bad kita ki kynthup ia ki hynriewphew-phra tylli ki 6 ron, kaba long kaei kaei ha kaba ym shym la don uno uno u nongtied ha ka tei ka lympung ialehkai ban lah kynjoh sha kattei ki ron ha ka prokram ialehkai jong u snem. Shuh shuh ruh utei u khlur ialehkai IPL ka Mumbai Indians u la lah ban khur ia ar tylli ki 100 ron tam bad khyndai tylli ki 50 ron kynthup ia ki lai ha ka T20 World Cup 2022 kiba lah iarap ia ka kynhun ban rah ia ka jingjop da 28 ron jong ki 40 tylli ki jingialehkai jong ka ha u snem ba lah dep.
Naduh ba u lah pawnam bha ha ka ri bad ha ka pyrthei baroh kawei ha u bnai Lber 2021 bad ha kaba kut jong u snem 2022, u Suryakumar u la lah ruh ban thlieh haduh phraphew tylli ki 6 ron ha kaba ka dor-thong baroh ka long da 18 shah bun ban ia uno uno u nongtied ha kata ka por. U Suryakumar u kylla long ruh uba ar napdeng ki nongtied ba pawnam ha ka pyrthei ban lah ha ka ban kyntiew halade haduh 1000 tylli ki ron ha ka jingialehkai T20Is ha ka shi snem ialehkai.
Kumjuh ruh napdeng katei ka thei ialehkai jong ka ri, ka Harmanpreet Kaur ka lah kylla long ruh ka nongialehkai ba nyngkong ban shah jied mynta kum kawei na ki san ngut ki nongialehkai Kriket jong u snem ia kaba lah pynbna paidbah ha ka Wisden Cricketers’ Almanack 2023. Kumta ka tei ka kapten jong ka kynhun ialehkai ki kynthei, ka la lah ha ka ban btin lynti ia ka kynhun sha ki 3-0 ODI jingjop ha ka jingleit ban iakhun sha ri Bilat bad kaba nyngkongduh eh naduh u snem 1999 bad kaba long ruh ka kynhun kaba lah pyndep ia ka jingiaid lynti ha ka CWG 2022 da kaba khur takma Rupa. Katei ka nongialehkai ka la lah ruh ban kamai ia ki 754 ron ha ka ODI runs ha u snem 2021, kaba kynthup ia ka jingbym shah rem ha ka jinglah ban kamai ia ki 143 ron ha ka jingiakhun ODIs ha England.
Kumta katei ka nongialehkai ka lah nang iai kyntiew shuh shuh halade ia ka jingkamai ron kaba lah kot mynta sha ka 524 ha ka jingialehkai T20Is ha ka average kaba 32.75.
