Shillong, Ïaïong 19:
Ka jingshah mudui ki MLA kiba la shah jied dang shen ka dang bteng ha kaba mynta ka kynti, u la don uba leit mudui pyrshah ïa u MLA ka NPP na Mahendraganj, u Sanjay A Sangma.
Ïa u Sanjay, uba dei u kynum trai jong u Myntri Rangbah Conrad K Sangma, la mudui da uwei u briew ba la tip kyrteng kum u Ali Akbar.
Ha ka jingmudui sha ka Meghalaya High Court, u Akbar, uba dei u nongthep ‘vote’ ka 54-Mahendraganj Constituency ha South West Garo Hills, u la kynnoh ba ha ki kot thep kyrteng ha ka por ilekshon, u Sanjay u la pyni ba u dang don ki kam kontrak bad ka sorkar jylla.
Na ka liang u nongmudui u la kdew ba u Sanjay u dei ban shah pynduh noh ïa ka jinglong MLA katkum ka kyndon 100 (1) (a) jong ka Representation of the People Act, 1951 kumba la kdew ha ka Article 191 (1) (e) jong ka Riti Synshar bad ka kyndon 9 (A) jong ka Representation of the People Act, 1951.
Nalorkata, u Akbar u la kynnoh ba u Sanjay u dei ban shah mait kyrteng kum u MLA katkum ka kyndon 100 (1) (d) (i) & (iv) namar u la buhrieh ïa ki jingtip.
U nongmudui u la ong ba ka jingshah jied jong u Sanjay kum u MLA ka long kaba be-aiñ, bad kaba pynkheiñ ïa ka Riti Synshar bad kiwei pat ki aiñ, bad namarkata, u la kyntu ïa ka High Court ba kan pdiang ïa ka jingmudui.
Hadien ba u muktiar jong u Akbar, u Senior Advocate Kaustav Paul u la pyni ha High Court ïa kane ka jingmudui, na ka liang ka ïingbishar ka la bthah ba dei ban ai shithi (Notice) sha kiba shah mudui, bad ka jingbishar kan long biang ha ka 11 tarik Jymmang, 2023.
Ha kawei pat ka liang, u MLA barim ka NPP, u James Pangsang K Sangma, u la ujor pyrshah ïa u MLA ka TMC na Dadenggre, u Rupa M Marak, ha High Court, bad na ka liang ka ïingbishar ka la bthah ba dei ban ai byrta (Notice) sha ki nongshah mudui, bad ka jingbishar kan long biang ha ka 11 tarik Jymmang, 2023.
Hynrei ym pat lah ban tip halor kaei ka nongrim ba u James, uba la shah rem ha u Rupa ha ka ilekshon kaba la dep, u la leit ai ïa katei ka jingmudui.
Haduh mynta, ki don kumba hynñiew tylli ki jingmudui ha High Court pyrshah ïa ki katto katne ki MLA kiba la shah jied ha kane ka ilekshon kaba dang shu dep.
