Shillong, Ïaïong 19:
U State President ka National People’s Party (NPP), Dr. W.R. Kharlukhi ha ka Sngi Balang u la ong ba wat hadien ba ki seng kiba ïateh lok ki la kren pyrshah ïa ka NPP ha ka ilekshon ba la dep, hynrei ynda wan ha ka bor, ka seng (NPP) ka la shim biang ïa ki ban ïatreilang ha ka Sorkar.
“Ngin pynshai ba ngi dei ka seng kaba lamkhmat ïa ka Sorkar…kum ka seng ngi long kaba ïar, katto ki seng kiba ïateh lok bad ngi ki la kren ïa ngi, lada ngi kren ïa ki, ngi ïoh, hynrei ngi bat ïa ka jingïatrei paralok bad haba ngi wan ha ka bor ruh ngi shim biang ïa ki ban ïatreilang,” la ong u Dr. Kharlukhi haba pynpaw ka jingkyrmen skhem jong ka seng ban poi sha ka thong ha ka ilekshon ban wan ha Sohïong konstitwensi.
U la ong ruh ba man ka ilekshon kaba ka seng ka ïakhun, ka thong ka long ban ïaleh ban jop bad ka jingpynkhreh ka seng ha kane ka kynti ruh ka long ban jop ha kane ka konstitwensi (Sohïong).
Haba kylli lano ki nongïalam ba hakhmat jong ka seng kin hiar sha katei ka konstitwensi, u State President u la ong, “Ngin sa hiar, ki samla jong ngi ki la leit, nangta ka shnat treikam (Unit) jong ngi ka don hangto, u Bah Prestone nga ïohsngew un sa hiar ha ka 22 tarik, ka dang don ka por bad ngin sa hiar.”
Utei u nongïalam ha kajuh ka por u la pynkynmaw ba ki briew ki ‘vote’ na bynta ka MDA-II namar ba ka Sorkar ba la dep ka dei ka MDA-I bad ka risol ka pyni ba ki briew ki long na bynta ka MDA-II.
Kum ban shu kdew hangne, ka Election Commission of India (ECI) ka la pynbna ba ka tarik thep ‘vote’ na bynta ka ilekshon ha Sohïong konstitwensi, East Khasi Hills kan long ha ka 10 tarik u Jymmang katba ïa ka risol yn pynbna ha ka 13 tarik u Jymmang.
Ïa ka ilekshon ha Sohïong konstitwensi la hap ban pynsangeh noh shuwa hadien ka jingkhlad noh u kyrtong, u Bah H.D.R. Lyngdoh uba la thep kyrteng ban ïakhun kum u kyrtong ka United Democratic Party (UDP).
Haba phai sha ka jingïakhun ha Sohïong konstitwensi ha kane ka ilekshon ban wan, ki don 6 ngut ki kyrtong ki ban ïa aireng ba kynthup ïa u Bah Synshar Lyngdoh na ka UDP, u Bah S. Osborne Kharjana na ka Congress, Bah Samlin Malngiang na ka NPP, Bah Sandondor Ryntathiang na ka HSPDP, Bah Sereph E. Kharbuki na ka BJP bad Bah Stodingstar Thabah na ka AITC.
