Shillong, Ïaïong 19:
Wat la ka jingai por ka la kut, hynrei na ka liang ka Sorkar Jylla kat haduh mynta kam pat ïoh pdiang ïa ka jubab na ka Harijan Panchayat Committee (HPC) ha kaba ïadei bad ka saiñdur (Blue Print).
Haba kren sha ki lad pathai khubor, u Symbud Myntri Rangbah ka jylla u Bah Sniawbhalang Dhar u la ong, ka sorkar jylla haduh mynta kam pat shym la ïoh pdiang ïa ka jubab na ka Harijan Panchayat Committee wat la ka jingai por ka sorkar jylla ka la kut noh ha ka 10 tarik mynta u bnai ban jubab halor ka saiñdur.
“Haduh mynta ngim pat ïoh ïa kano kano ka jubab bad ha kine ki sngi ban wan ngin sa shong jingïalang noh hadien ba u Symbud Myntri Rangbah ka jylla Bah Prestone Tynsong u la wanphai sha ka jylla bad la khmih lynti ba ha ka taïew ban wan ka sorkar kan lum noh ïa ka jingïalang,” la ong u Bah Sniawbhalang Dhar.
Haba kylli na kaei ka daw ba ka HPC kam shym la ai ïa ka jubab haba ka sorkar ka la ai por haduh ka 10 tarik mynta u bnai, u Bah Sniawbhalang u la ong ïa ka daw dei ban kylli na ka HPC, balei ba kam jubab bad ka dei ka kamram jong ki ban ai ïa ka jubab.
“Lada kim phah ïa ka jubab, ka sorkar kan sa shong ïa ka jingïalang ban ïakren halor kane ka bynta bad ngi don hangne ban shim ïa ka rai na ka bynta ka jong ki,” la shuh u Bah Sniawbha.
Nangta shuh shuh u la ong ka sorkar ka la pyrshang ban pynbeit kloi noh ïa kane ka mat khamtam haba ka ïingbishar ruh ka la bthah ba dei ban pynbeit noh mardor ïa kane ka kam.
