Nongstoiñ, Ïaïong 20:
Ka jingduh bording kaba khah khah ha ka thaiñ Mawshynrut ka la wanrah ïa ka jingsohsat haduh katta katta ym tang ïa ki khynnah skul, ki paidbah khamtam kiba don ha ki thaiñ nongkyndong bad wat ïa ki nongbylla kiba pyndonkam da ka bording.
Halor kane ka mat, ka HYC Mawshynrut ka la pynpaw ba kum ki paidbah ki sngewthuh shai ba ka don ka jingpynlip bording ha ka Jylla hi baroh kawei, hynrei kaba sngew lyngngoh ka long ha ka thaiñ Mawshynrut ka jingpynlip bording ka long da ki taïew. Kane ka la pynlong ïa kiba im jakpoh da ka bylla lyngba ka bording ba kin duh ka bylla bad wat ban pynbiang bam ha ïing ha sem.
Nalor nangta ka HYC ka la ong ruh ba ki paidbah ka thaiñ Mawshynrut baroh kawei ki la ud la nam ba ka bording ka duh khah khah da ki kynta ha ka shisngi bad sha nongkyndong lei da ki taïew, hynrei ka bill ne ka bai thang bording ilektrik ka ïaid beit kumba ju long.
Kumta halor kane ka bynta, ha ka Sngi Palei ka HYC ka la leit ban buh da ka jingthoh ha ka shlem treikam u SDO MePDCL Mawshynrut, hynrei la lap ba katei ka shlem treikam ka khang dam. Kumta ka HYC ka kyntu ïa ka tnat ba dei peit bad ïa u SDO ba kan shim khia ïa kane ka bynta khnang ba kan long ka jingmyntoi ïa ki paidbah nongshong shnong jong ka Mawshynrut hi baroh kawei.
Ha kawei pat ka khubor ka HYC ka leit ruh ban jurip ïa ka jingpyntrei ïa ka surok Riangdo-Athiabari kaba 37 Km ha kaba ka HYC ka la lap ba ka jingpyntrei ka long kaba torti.
Lah ban kdew hangne ba ka mang pisa na ka bynta ban pyntrei ïa katei ka surok ka long 97 klur tyngka bad na ka liang ki nongkitkam ka HYC ki la ïathuh ba la pyntrei ïa katei ka surok da ka Agarwal Road Construction.
Nangta shuh shuh ki la ong ba ki la lap ba ka jingtrei ïa katei ka surok naduh ki nala um, ki kynroh ka muri bad ka jingsiang ïa ka rong kim biang satia bad ki don ki jaka jaka ba ka biang bad ki don ki jaka ka stang bad tlot ha rukom khleh ïa ka rong, don ruh ki jaka ba ki khlem pynkhuid ïa ka pum pum hynrei ki siang ïa ka rong bad kane ka lah ban pynjot ïa ka surok ha ki khyndiat snem.
Halor kane, ka HYC kala leit ïakynduh ruh ïa u SDO PWD ha kaba u kular ba un shimkhia ïa kane ka kam bad shen un sa leit ban jurip hi bad khmih bniah ïa ki bynta jong kane ka surok bad ïa ki bym biang un phah khoh biang bad phah shna biang.
