Shillong, Ïaïong 20:
Ka Myntri Sorkar ba peit ïa ka tnat aiñ, ka Kong Ampareen Lyngdoh, ka la kyntu ïa ki seng bapher bapher bad ïa ki seng saiñ pyrthei ban ap haba ïadei bad ka mat ‘roster system’ namar ba ka Sorkar ka kwah ba ka rai kaba yn shim, kan dei kaba biang.
Haba ïakren bad ki nongthoh khubor, ka Kong Ampareen ka la ong ba ka don ka jingpynsngewthuh shane shatai ba kan noh shiliang sha kawei ka jaitbynriew bad ban beiñ ïa kawei pat.
“Hynrei ka Sorkar kam long kumta ban lehbeiñ ïano ïano. Namar ba ka dei ka jingbthah kaba wan na ka Ïingbishar namar ka Jylla kam leh ïa kata ka rukom bhah kam ha ki 50 tylli ki snem. Ka Sorkar ka kohnguh ïa ka jingbthah ban khmih bniah ïa kata ka rukom bhah ïa ki kam katkum ka Reservation Policy. Ynda la dep khmih bniah, ka dei ka kamram jong ka Sorkar ban pyntip pat sha ka Ïingbishar ia kaei kaba ,dei ban leh” la ong ka Kong Ampareen.
Kane ka Myntri ka la ong ba ka Sorkar ka shim khia ïa kane ka kam, bad kan sa don ka jingïalang ka Kynhun Myntri ban ïatai ïa kane.
“Ka jingpynphriang ïa ka jingpyntip ka bym bakla kan ïarap ïa ngi ki nongshong shnong. Kumta ngin ïai ap ban khmih bad peit ïa kane, namar ngi don ki jaitbynriew trai muluk bad kiwei pat. Ka roster system ka dei jong ka Ïingbishar kaba bthah ban pyntreikam kumno ngi bhah ïa ki kam ha kine ki phew snem la ka long ne em katkum ki kyndon aiñ,” la ong ka Kong Ampareen.
Shuh shuh ka la ong ba baroh ngi ieid ïa ka ri, ka jaitbynriew, bad ym dei ban shah ïalam bakla.
Ka la bynrap ba ka Reservation Policy ka la treikam naduh u snem 1972, lehse, ym shym la peit bha ïa ka jingbhah kam, ha kaba ka Ïingbishar ruh ka bthah ïa ka Sorkar ban peit ïa kane ka bynta.
