Shillong, Ïaïong 20:
U MLA ka BJP na Pynthorumkhrah konstitwensi uba dei ruh u Myntri ha ka Sorkar MDA-2 u Bah A.L Hek, u la ïathuh ba ka jingïakren paralok bad ki MLA ka All India Trinamool Congress (AITC) ka la don, hynrei ban ong ba kin rung noh baroh sha ka seng BJP kam pat poi ha kaba kut.
U la pynpaw ba kam long ban ïakren ha ka ‘phone’, hynrei un sa batai bha ynda la poi sha Shillong namar mynta u dang leit donkam sha Pune.
Nalor kata, u la ïathuh ba ha kine ki sngi u la dep ïa shong kai bad u Bah Charles Pyngrope uba dei u President ka TMC Meghalaya, u Dr Mukul Sangma, hynrei ka dang dei ka jingïakren paralok ym pat dei ka jingïakren ban pynkut.
Nangta u Bah Hek u la pynpaw ka jingsngewkmen ba u kloi ban pdiang lada wan ki MLA ka TMC ban rung sha ka BJP.
Ha kajuh ka por u la pyntip lada kane ka jingïakren bad ka TMC ka la biang kin sa ïa pynbeit bad u JP Nadda uba dei u President ka BJP ha Delhi ryngkat ki nongïalam ka BJP hapoh ka jylla.
Katkum ki khubor kiba la ïoh lum la ïathuh ba ka jingslem ka TMC ban pynïasoh sha ka BJP ka lah ban dei namar u President ka TMC Meghalaya, u Bah Charles Pyngrope um treh ban leit pynïasoh.
Ki khubor kiba ïajan bha na ka seng TMC bad ka BJP ki la ïathuh ba kane ka jingthmu ban leit pynïasoh sha ka seng BJP ka dang don hapdeng ka jingïakren bad ki nongïalam ka BJP ha Meghalaya.
Kum ban pynkynmaw, ki MLA ka TMC kiba jop ha kane ka ilekshon ki long san ngut, kita u Dr. Mukul Sangma uba dei u Myntri Rangbah barim ka jylla, Bah Charles Pyngrope uba dei Lamphang barim ka ïingdorbar ka jylla, ka Miani D Shira kaba dei khun jong u Dr. Mukul Sangma, u Rupa M Marak bad u DR. Mizanur Rahman Kazi.
Lada kine ki MLA ka TMC kin rung noh sha ka BJP, ka jingdon ki MLA ka BJP kan kot sha ka 7 ngut namar ka BJP ka la don lypa 2 ngut, kita u Bah A.L Hek bad u Bah Sanbor Shullai.
