Sanaa, ïaïong:
Katkum ki khubor la ong ba kumba 80 ngut ki la khlad bad da ki spah ngut kiba la mynsaw ha ka jingiakulmar kaba la jia hapdeng ka jingsam ia ki marbam bad ki jingnoh synñiang sha Yemen kaba long ka ri ba la jot bad julor na ka thma. Dei namar kane ka daw ba ki paidbah nongshong shnong jong katei ka jaka ki la hap ban iaknieh ia ka bam bad ia ki jingdonkam ba la pynpoi sha katei ka jaka ha ka Sngi Palei.
Katei ka jingjia ka long hadien khyndiat sngi jong ka jingleh niam Eid al-Fitr jong ki jaitbynriew Muslim, kaba la jan poi ruh sha kaba kut jong ka jingleh niam Ramadan jong katei ka jaitbynriew Islam.
Ki bor pyniaid ka Huthi ki la iathuh ba kumba 85 ngut ki la khlad bad palat 322 ngut kiba mynsaw na katei ka jingia ñiom paidbah ha katei ka sngi.
Kumta la ong ruh ba ki longkmie bad ki khyllung ruh ki la kynthup lang napdeng kitei kiba khlad baroh. Hynrei ki bor pyniaid kim pat lah ban ai jingpynshai bha haba iadei bad katei ka jingjia.
La iathuh ba kane ka la jia ha kawei ka skul ha kaba la sam ia kitei ki jingai sngewbha bad ki jingnoh synñiang naka bynta kitei ki paidbah kiba la mad ia ki jingeh bad jingkyrduh bam.
