Mumbai:
Ka Asha Parekh bad ka Tanuja kiba long ki puron ba la slem bha jong ka Bollywood ki la kren halor ka jingduhnoh jong ki ia ka lad ban ak phlim kumba long ha ki por bad snem ba la leit ha kaba ka daw halor kane ka dei tang namar ba ym shim la don ki khana ha ki phlim ki ban iahap ia ki ban ak.
Kine arngut ki puron kiba la ak ha ki katto katne ki phlim ba itynnad ha ki por mynshwa ki sngew ba ka don ka jing leh shiliang khmat ha Bollywood ha kaba iadei bad ka rukom thoh khana ha ki phlim naba ki tyngshop kum u Amitabh Bachchan wat lada ula kham noh ha ka rta pynban u dang ioh ban ak phlim.
Shuh shuh kine arngut ki la bynrap ruh ba lada ki ioh phlim ban ak kin hap ban ak ia ka bynta kum ki kmie-ieit bad haba nujor pat bad u Amitabh u ioh pynban ban ai ia ka bynta kaba kham biang na ka bynta jong u bad kaba kham long kyrpang bad kongsan.
Ka Asha ha kawei na ki jingwan shim bynta ka la kren halor ka jingsngew diaw mynsiem jong ka ha kaba iadei bad ka jingleh shiliang khmat ka Bollywood bad kyrmen skhem ba ha ki snem ban wan ki puron kum ma ka kin ioh ban ak ruh ha ki bynta ba sha khmat.
Haba kren halor ka jingkylla ka rukom ak phlim jong ki puron ka Asha bad ka Tanuja ki la pynpaw ba ha kine ki por ba mynta ki puron wat lada ki la dep ban kyntiew kurim bad don khun don kti pynban ka lad ka dang plie ia ki ha Bollywood hynrei ha ki snem ba la leit ka puron tang shu dep kyntiew kurim ka lad ka la kut ia ka ha ka kam ak phlim.
Dei na kane ka daw jong ka jingshah leh shiliang khmat ki kynthei ha Bollywood, ba ka Tanuja bad Asha ki la ai mynsiem ia ki puron ba katba ka lad ka dang plie ia ki ban don bynta kim dei ban pyn sepei ia kane bad ki dei ruh ban trei shitom bad pynleit jingmut ha ka kam ka jam jong ki.
