Washington:
Katkum ba la ioh jingtip da ka tnat iada jong ka United States, ha ka Sngi Ba-ar la lap ba ka China ka lah ban pynmih bad pyndonkam ia ki ‘Drone’ kiba stet tam kumba lai shah ia ka jingstet jong ka sur- jingsawa kaba mih. Ia kitei ki drone, ka China ka lah ban pyndonkam naka bynta ban phah syntiat bad peit thuh ia ka jinglong jingman jong ki jaka kiba ka thmu ban leh eiei.
Ia kane ka la lap da ka tnat National Geospatial-Intelligence Agency.
Hynrei la ong ba ym pat don ba lah ban pyntikna ia katei ka khubor la ka long ne em kaba dei ruh, namar ha ka 9 tarik u Nailar jong u snem ba la leit ruh, la iohi ia 2 tylli ki roket WZ-8 ba la pynher ryngkat bad kitei ki drone bad ba la pynher da ka China kumba 350 mile na Shanghai.
Namar ka US ka la ong ruh ba ka People’s Liberation Army (PLA) jong ka China, ka la dep wanrah lypa hi ia kum kitei ki jait drone ki ban peit thuh ia ka jinglong- jingman ha Taiwan bad ban tip ruh ia kaei kaba ki bor ba nabar ki leit ban leh bad ban iadei kam bad ka Taiwan.
Haba iadei bad kane, ka FBI ha ka Sngi Palei, ka la kem noh ia u Jack Douglas Teixeira, 21 snem ka rta uba long u dkhot pahara jong ka tnat Air National Guard ka U.S., halor ka jingpyllait tuh ia ki kot- ki sla bad ki jingdonkam jong ka US bad la ong ba katei ka jingleh jong u ka la pynhiar dor ia ka United States hakhmat ka pyrthei baroh kawei.
Katei ka jinglait ki kot- ki sla jong ka US ka dang shu jia shen ha ki khyndiat por ba la leit jong une hi u bnai, bad kaba la wanrah jingma ruh ia ka US namar ka jinglait paidbah ki rukom treikam jongka ha kane ka por.
