Shillong, Ïaïong 20:
U President ka People’s Democratic Front (PDF) uba dei u MLA ka Sohra konstitwensi, u Bah Gavin Miguel Mylliem, u la kubur ba na ka liang ka National People’s Party (NPP) bad kiwei ki seng ruh ki la khot ïa ki ban ïadonlang noh, hynrei ban shim kat ïa kane ka rai, donkam ban ïatai ïathir shwa ha ka Central Executive Committee jong ka PDF.
Haba ïakren bad ki nongthoh khubor mynta ka sngi basaw, u Bah Gavin kum u President ka PDF, u la ong ba haduh mynta, ma u bad u Bah Banteidor Lyngdoh uba dei u MLA ka Mawkynrew konstitwensi, kim pat don kano kano ka rai kaba la shim, hynrei kum ïa kane ka mat hap ban ïakren lang ha ka CEC jong ka PDF.
U la ïathuh ba mar ïa jop ïa kane ka ilekshon MLA, na ka liang ka NPP ba kynthup ruh ïa u Myntri Rangbah u la khot, hynrei kum ki nongïalam, donkam shwa ban shimlang ïa ka rai ha ka CEC.
Haba kylli, la ka don ka thong ba ka NPP ka kwah ïa ki MLA ka PDF baroh 2 ngut ban ïasoh noh hashwa ka jingthep vote ha ka ilekshon MLA ha Sohïong, une u President ka PDF u la kyntait ba kam don satia kum kata ka thong ban rung hashwa ka ilekshon Sohïong.
Ha kawei pat ka liang, u Bah Gavin u la ong ba ka PDF tang mar ïa jop ïa ka ilekshon, ka la donlang kajuh ka thong, kata ban donlang bad ka UDP ban thaw ïa ka Sorkar synrop, hynrei ban thaw ïa ka Sorkar donkam ïa ka jingbunpaid kaba long 31 ngut ki MLA.
U Bah Gavin u la ïathuh ba kiwei ki seng saiñ pyrthei ruh kum ka Voice of the People Party, TMC bad Congress ki donlang, hynrei haba don bun tylli ki seng, la mih bun ki jingbuh kyndon na ka bynta ban thaw ïa kata ka Sorkar synrop khlem ka NPP, bad kam long satia kaba suk ban pynbit pynbiang.
U la ong ba ka VPP ruh ka wanrah bun tylli ki kyndon, bad kiwei ki seng ruh ki don la kijong ki kyndon.
Haba kylli la kata ka jingmih bun tylli ki kyndon ka khanglad pynban ban thaw ïa ka Sorkar ha kato ka por, u Bah Gavin u la ong ba um kwah ban ong ei ei ïa kata, hynrei u la bynrap ba katba nang ïaid ka jingïakren ban thaw ïa kata ka Sorkar ban ïalam da ka seng riewlum, kiwei pat ki la nang ïaid noh la kajong, bad kane ka poi sha ka bynta bym lah ban thaw ïa kata ka sorkar synrop.
Halor ka jingkyrshan ka PDF ïa ka Sorkar MDA-II kaba ïalam da ka NPP, u Bah Gavin u la ong ba ki MLA ka PDF ki leit ban kyrshan ynda kiwei ki seng ki la leit namar la sngewthuh ba ym lah shuh ban thaw ïa kata ka Sorkar synrop ba ïalam ka seng riewlum.
