Nongpoh, Ïaïong 20:
Ha kawei ka jingjia ïatyngkhuh kali ha ka Sngi Palei ha Ri Bhoi, kumba san ngut ki briew kiba shong ha ka kali Maruti Car ki la lait salit na ka jingjia ba sngewsih hadien ba ka kali ba ki shong ka la shah tynrah ha ka trok kit umphniang ha ka surok Umroi Bypass kaba dang hap hapoh ka shnong Mawpun Kshaid.
Kumba la ïoh lum jingtip, la ïathuh ba kane ka dei kaba la jia ha ka por 1:20 nohphai sngi katba katei ka kali Maruti Car kaba la shong da saw ngut ki longkmie bad uwei u nongñiah ka dang wanphai na Umroi ban leit sha Umsning, hynrei mar ïa poi ha Mawpun Kshaid ki la ïakynduh noh ïa katei ka jingjia.
La ïathuh ruh ba katei ka trok kit umphniang Diesel kaba dang thmu ban leit sha ki thaiñ Jowai ka dei kaba la pynher sted bha bad ba u nongñiah um lah shuh ban teh lakam ïa kali kat haduh ba kan kylla bad leit tynrah pat sa ïa katei ka kali Maruti kaba dang wan na ka liang pyrshah.
La ïoh jingtip ba tang mar ïa jia kane ka jingïatyngkhuh kali, na ka liang ki nongshong shnong kiba la sakhi, mar mar ki la leit ban ïarap ïa kitei ki san ngut ki briew kiba shong hapoh ka kali Maruti Car kiba la mynsaw malu mala bad ïalam pat ïa ki sha Bhoirymbong CHC na ka bynta ban ïoh ïa ka jingsumar. Katba u nongñiah bad nongbud jong katei ka trok ki la phet krad noh na katei ka jaka hadien katei ka jingjia.
La ïoh jingtip ba tang katto katne minit hadien katei ka jingjia, baroh ar tylli kitei ki kali ki la kem ding kynsan puk kat haduh ba ki paidbah kim lah shuh ban leh eiei. hynrei ban shu peitkai na jngai ïa ki thylliej ding kiba la klang bad bamduh ïa kitei ar tylli ki kali.
Na ka liang ki pulit pynlip ding ka Umïam ruh kiba la wan poi kloi sha katei ka jaka tang mar ïa ïoh jingtip, ki la pyrshang ban ïakhun ban tem ïa ka ding. Hynrei, namar ka jingduna jong ki kali pynlip, ka shim por ïa ki bad kat haduh ba ki lah ban pynlip ïa katei ka ding, baroh ar tylli ki kali kila ingkhong khait.
