Patna, ïaïong:
U nongtied ba tbit jong ka kynhun ialehkai Kriket ka ri u Suryakumar Yadav, u la nang iai bteng shuh shuh ban iai neh biang ha ka kyrdan ba 1 ha ka pyrthei wat ha ka thup kyrdan ba thymmai mynta jong ki nongtied ha ka lympung T20Is ia kaba lah pyllait paidbah da ka International Cricket Council (ICC).
Kumta ruh ha kaba iadei bad kane ka bynta, u Suryakumar u la ioh ban kynjoh biang sha katei ka kyrdan namar ka jinglah jong u ban ialehkai bha ha kaba u lah kamai ia ki 906 dor-thong bad uba lah palat ruh ia ka 100 dor-thong ha ka jingtam kput jong u shakhmat ia uba wan ha ka kyrdan ba-ar na ka ri Pakistan u Mohammad Rizwan (798). Ka khubor ka iathuh ruh ba u Surykaumar uba tang marwei napdeng ki nongtied jong ka kynhun ialehkai ka ri ha ka thup ba 10, u lah iai shadkmen ha ka jingiaid lynti ba seisoh bad ba jop ka jong u ha aiom ialehkai Kriket jong u 2022, ha kaba u lah iai bteng ia ka jingseisoh ka kamai ron ha ka jingiakhun pyrshah bad ka New Zealand bad Sri Lanka dang ha ki khyndiat bnai ba lah dep jong une u snem ba mynta. Nalor jong u, sa uwei pat u khlur tied jong ka kynhun ialehkai ka ri uba long ruh u kapten barim u Virat Kohli u long uwei pat u rangialehkai ba kynsai tam ka kynhun ha katei ka thup ba thymmai jong ki nongtied ha kaba u lah nang iaisah biang ha ka jak aba 15.
Napdeng ki nongkawang bol, u Arshdeep Singh u long u rangialehkai uba bat ia ka kyrdan ba shalor ha ka jak aba 14, katba u Bhuvneshwar Kumar u lah shah pynhiar noh sha ka jak aba 19. Ha ka thup ‘All Rounders’, u Hardik Pandya u long uba ba-ar ha ka kyrdan kata hadien u Shakib Al Hasan uba bat ia ka kyrdan ba hakhmat jong u ha ka thup. Shuh shuh ruh ki 10 wiket ha ki lai jingialehkai T20Is ki lah iarap shibun ia u Haris Rauf, Shadab Khan na ka bynta ban long uba nyngkong ha ka thup kawang bol na ka kynhun ialehkai ka Pakistan. <
Ha kaba iadei bad ka jingshah kyntiew kyrdan ka jong ki, u Rauf u la lah ban khur biang sa shisien ia ki 4 wiket pyrshah ia ka New Zealand ha ka jingialehkai T20Is kaba mynta. Kumjuh ruh u Ish Sodhi (620) bad Shaheen (624) ki long kiba lah kiew kyrdan mynta shakhmat da saw bad ar jaka. Kiwei pat ki jingiohnong ki nongialehkai ha ka jingshah kyntiew kyrdan ki long na ka kynhun ialehkai ka Sri Lanka ha kaba u Prabath Jayasuriya u lah nang iai bteng ia ka rukom ialehkai ba tbit ka jong u naduh kaba sdang jong ka jingialehkai Test.
U Jayasuriya u don ia ki 43 wiket ha ki 6 tylli ki jingialehkai Test bad kaba u lah donlang ia ki san-san wiket kiba u lah bat bad ka jinglah ban kamai bun wiket ka lah iarap ia u ban kiew mynta da 13 jaka ha ka thup jong ki nongkawangbol ha ka jingialehkai Test na ka bynta ba un ioh rung ha ka thup kyrdan ba 20. Kumta ruh u Ramesh Mendis (576) uba lah kiew da lai jaka hadien ka jinglah ban khur ia ki saw wiket ha ka innings ba-ar jong ka jingiakhun Test pyrshah ia ka Ireland, u wan ha ka jaka ba hadien u Jayasurya kata ha ka jaka ba 32.
