Shillong, Ïaïong 20:
U Myntri ba khmih ïa ka tnat PHE ka Jylla, u Marcuise Marak, u la ong ba ka tnat ka la don jingtip halor ka jinglong jingman jong ka jingkyrduh um ha nongbah Shillong bad na ka liang ka tnat ka la ïakren ruh halor kane.
“Ngan sa khot ïa ka jingïalang jong ki heh ophisar ka tnat na ka bynta ban khmih bniah halor kane ka kam bad ban peit kaei ba na ka liang ka tnat ka lah ban leh halor kane,” la ong u Myntri haba kren sha ki lad pathai khubor ha ka Sngi Palei.
U Myntri u la ïathuh ba ka jingkylla jong ka suiñ bneng (climate change) ka dei kawei na ki daw kaba la wanrah ïa ka jingsdang rngat jong kiba bun tylli ki tyllong um, kaba la wanrah pat ïa ka jingkyrduh um.
“Ka jingpynpoi ïa ka umbam umdih ka la shah ktah namar ka jingtyrkhong jong ki tyllong um, hynrei na ka liang ka tnat bad ki ophisar jong nga, ngi dang ïaleh katba lah ban peit ïa kaei kaba lah ban leh bad shen ngan sa khot ïa ka jingïalang ban ïakren bad khmih bniah halor kane,” la ong u Myntri.
