Shillong, Ïaïong 20:
U President Rangbah ka Voice of the People’s Party (VPP) uba long ruh u MLA na Nongkrem konstitwensi, u Bah Ardent Miller Basaïawmoit, u la ong ba hadien ka ilekshon kaba dang shu dep bad hadien ka jingïoh ïa saw ngut ki nongmihkhmat, ka seng ka khlem iehbeiñ ïa u paidbah, hynrei ka la pyndep ïa ka kamram bad ki kular kiba ka la khlei hashwa ka ilekshon bad dei na kane ka daw ka seng ka la rah ïa ka mat halor ka bhah thung kam thung jam hapoh ka ïingdorbar thaw aiñ.
Ïa kine ki kyntien u Bah Ardent u la kren ha ka jingïalang ka VPP kaba lai sien kaba la pynkut shwa ïa ka wat kaba nyngkong ha Jaïaw Pdeng kaba la long mynta ka sngi Palei ha ka jingïadonlang ki MLA ka VPP, ki kyrtong ka VPP kiba shah rem ha kane ka ilekshon bad ki paidbah.
U Bah Ardent u la pynkynmaw ruh ïa ki jingkren jong U Myntri Rangbah ka jylla u Conrad Sangma uba ong ba kito kiba pyrshah ïa ka Roster System kin leit sha ka ïingkashari ban ujor ïa ka jingsngew jong ki. Ki la don ruh kiba pyrshang ban theh umpjah ha ryngkat ka jingkynnoh da kaba ong ba ka jingleh jong ka VPP ka dei ka jingleh ka bym don nongrim.
Shuh shuh u la ong ruh ba ki la don kiba ujor halor ka jingkren ïa kane ka mat sha ka ïingbishar, hynrei ka ïingbishar pat ka pynphai kylla ïa ka jubab da kaba aiti ha ka jingstad bad ka rai jong ka ïingdorbar thaw aiñ bad ka sorkar ban pynbeit ïa ka Reservation Policy.
U la ong ruh ka jingpyntreikam ïa ka Roster System naduh u snem 1972 ka la ktah shibun ïa ki samla wad kam jong ka jylla bad kum ka seng ka la pyndep ïa ka jingkular ban ïasaid na ka bynta kane ka mat. Ha kane ka sngi na ka liang u Bah Ardent u la pynkynmaw ruh ïa ki ar tylli ki sengbhalang kiba la pyrshang ban pynsngewthuh bakla bad pynkulmar jingmut ïa u paidbah ha kaba ïadei bad ka jingkhmih biang ïa ka Reservation Policy bad u la ong ba u khlem khmih lynti na kiba kum kita ki sengbhalang ki ban kren pyntieng pynban ïa ki paidbah jong ka jylla.
U la ong ruh kumba ka sngi pynshai paidbah jong ka seng ka la kut mynta ka sngi ka 20 tarik Ïaïong kaba sah mynta ka long sa tang ban pynlong ïa ki jingïakhih na ka bynta u paidbah.
U Bah Ardent u la ong ba kiba bun, ki kwah ban ïakhun ïa ka ilekshon na ka seng VPP, hynrei na ka daw ka jingbun jong ki kyrtong kiba na kawei sha kawei pat ka konstitwensi, kumta ym pat lah ban ai ïa ka rai.
Nangta, u la ong ruh wat hapdeng ka jingbun jong kiba wan pan ïa ki tiket ban ïakhun ïa ka ilekshon ha u snem ban wan, hynrei kum ki nongïalam ki hap ban pyrkhat bad hap ruh ban peh ïa ki kyrtong namar ïoh kin don kiba shu wan ban shim kabu bad kum ka seng kan hap ban bishar bha, la bynrap u Bah Ardent.
U la ong ruh ba kum ka seng ka kwah ïa ki briew kiba don ïa ka nongrim kaba skhem bad ha kajuh ka por u la kyrpad bad maham ïa ki briew kiba shna ïa ki kynhun hapoh ki ‘Whatsapp’ ba kim dei ban leh ïa kum kine ki jait kam khlem da ïoh jingbit na ka seng namar ki don ki riew shim kabu kiba shna ïa ki group hapoh ki whatsapp kiba lah ban pynbakla ïa ka jingmut bad ka jingshaniah jong ki paidbah ïa ka seng bad kiba lah ban shna ïa ki group whatsapp dei tang kiba ka party ka la mynjur da ka seng VPP.
