Shillong, Ïaïong 20:
Ka Harijan Panchayat Committee (HPC) ha ka Sngi Palei ka la ther kylla ïa ka sorkar jylla ha kaba ïadei bad ka saiñdur ban pynkynriah ïa kiba shong ba sah ha Them Ïew Mawlong, bad ka la ong ba kane ka saiñdur ka long kaba dang don jingduna, ka bym biang, ka bym don ka jingleh hok bad kaba long pyrshah ïa ki nongshong ha kane ka jaka.
Ka HPC ka la phah ruh da ka shithi ba hynriew sla sha u Deputy Secretary ka sorkar jylla bad kiwei pat ki tnat treikam ha kaba ka la ong, “Ki don bun ki jingduna, bad ki jingkynthoh ki bym ïahap ba la ai da ka High-Level Committee jong ka sorkar Meghalaya.”
Ha u kyrwoh khubor, u Secretary ka HPC, u Gurjit Singh, u la ong ruh ba ka HPC ka sngewdiaw ba naduh ba la wan ka sorkar bathymmai, ki Myntri Sorkar, ki MLA bad katto katne ki kynhun, ki la kren lap lah da kaba ong ba yn pyndep ïa ki kam ki jam kiba ïadei bad ka jingpynkynriah ïa kiba sah ha Them Ïew Mawlong hapoh u bnai Ïaïong.
“Ki don jadu aïu ban pyndep ïa kita ki kam ki jam tang hapoh khyndiat sngi? Kane ka mat ka dei kaba dang sah ha ïingbishar, bad ki shu kren leh mynleh ban burom ïa ka ïingbishar. Hynrei ngin ym pyndem ha ki jingbyrngem saiñpyrthei,” la ong u Gurjit Singh.
Nalorkata, u la ong ba ka HPC ka la leit sha ki jingïalang ba la khot da ka sorkar da ka jingmut kaba shai, hynrei ka la shem ba ka sorkar ka ai ïa ki jingtip kiba ïalam bakla sha ki lad pathai khubor. “Ha ki jingïalang, ka sorkar ka pyrshang ban pyntieng koh tympan ïa ngi ba ngi dei beit ban pdiang ïa kaei kaba ka ong. Ka rukom leh jong ki nongïalam saiñpyrthei ka long beit ban shu byrngem byrsit. Hynrei ki buh ïa ka jingim bad ïa ki jingdon jingem jong ki ha ka jingma,” la ong u Gurjit.
Ka HPC ka la kynnoh ruh ba kata ka jingong ban pynkynriah ïa kiba sah ha Them Ïew Mawlong ka long kaba bakla namar ka dei tang ka jingthmu ban pynduh ïa ka hok jong kiba shong ba sah ha kane ka jaka bad ban pdiang da ki jaka sah kiba long kum ki kamra ha patok.
“Kiei kiba ngi la dawa mynshwa bad ki phra tylli ki mat kiba ngi la dep ban pynpaw ki dang ïeng haduh mynta, bad ngin ym pyndem ha ka jingbyrngem saiñpyrthei namar ka suk bha ïa ka sorkar ban leh kumne bad namar katei ka jaka ha Them Ïew Mawlong ka la kylla long kum ka jaka khaïi kaba heh bha,” la ong u Gurjit.
Shuh shuh u la ong ba ka HPC, kaba la lamkhmat ban ïakhun na ka bynta ka hok jong kiba shong ba sah ha Them Ïew Mawlong mynta la 30 snem, ha ka jubab ba ka la ai sha ka sorkar ka la kren shai ba ka jaka ka dei jong u Syiem ka Hima Mylliem, bad ym jong ka sorkar, bad kano-kano ka jingpyrshang da ka sorkar ban thied ïa kane ka jaka kan long pyrshah ïa ki kyndon jong ka Meghalaya Land Transfer Act.
Haba pynkynmaw ïa ka jingjia ha ka 31 tarik Jymmang, 2018, ka HPC ka la ong ba da kaba shim kabu na kane ka jingjia kaba rit, ka la mih pynban ka jingdawa ban pynkynriah ïa kiba sah ha Them Ïew Mawlong tang ban ïoh phoida ha ki kam saiñpyrthei. “Ngi don lut ki kot ki sla ban pyni ba ngi lah ban sah kum ki nongshong shnong ka Punjabi Lane,” u la bynrap.
U Gurjit u la ong ruh ba ka HPC ka la kdew ïa ki jingbym biang ha kaba ïadei bad ka saiñdur ba la pynkhreh da ka sorkar halor ka jingpynkynriah ïa kiba shong ba sah ha Them Ïew Mawlong naduh ka jingrit ka jaka, ka jingrit ki ïing, ka jingpynkheiñ ïa ki kyndon shna ïing, ka jingbym don ka saiñdur ban pynpra ïa ka Them Ïew Mawlong, bad ka jingbym shai mano ban long trai ïa kata ka jaka bad ïa ki ïing ki sem.
“Ki don bun bah ki jingduna. Ka sorkar ka dei ban pynshai halor kine bad hadien kata, ka Harijan Panchayat Committee kan sa shong pyrkhat khlem da pynkheiñ ïa ki hok ki jong ngi,” la ong u Gurjit.
Haba khyrwit ïa ka jingleh kyrkieh jong ka sorkar, ka HPC ka la ong, “Ka Supreme Court bad kiwei pat ki ïingbishar ki la pynksan ba ka hok ban im ïa ka jingim kaba donburom ka dei ka hok kaba ym lah ban pynkhlad bad ki jaka sah ruh ki dei ban long kiba biang. Namar jong kine ki rai jong ki ïingbishar, ki nongshong shnong ka Them Ïew Mawlong ki don hok ban ïoh da kaba kham bha.”
Ha kajuh ka por, ka HPC ka la kyntu ïa ka sorkar bad ïa ki nongshong shnong ka Meghalaya ba ka sorkar ka dei ban sangeh noh ïa kane ka jingleh jong ka bad ban sha ïa kito ki briew kiba don ha Them Ïew Mawlong ba kin shna ïa ki ïing ki sem jong ki.
Ha kajuh ka por, u Gurjit u la ong ba ki nongshong shnong jong kane ka jaka kin pynthikna ba ka jaka kan long kaba itynnad bad kaba khuid, bad ha kaba ïadei bad kane, ki nongshong shnong ki ïoh ïa ka jingkyrshan bapura na ki Sikh.
“Ki nongshong shnong ka Punjabi Lane ki kwah ban im ïa ka jingim kaba donburom ha ka khyndew ka shyiap jong ki kpa tymmen jong ki, bad kam ïahap satia ban kheiñ ba ki dei ki nongwei. Ban weng ïa ki jingeh, dei ban ïaid da ka lynti jong ka jingsuk bad kaba lah ban ïa pdiang lang khlem da ïuh roit ïa ka hok jong ngi,” la ong u Gurjit.
