Shillong, Ïaïong 20:
U Chief Executive Member (CEM) ka Khasi Hills Autonomous District Council, u Bah Titos Chyne bad ki Executive Member kiba kynthup ïa u Bah Rangkynsai Kharbuki bad ka Kong Grace Mary Kharpuri ki la leit jurip ïa ki nongdie jingdie madan naduh Ïew Mawlong shaduh Motphran ki bym don laisen khaïi ha ka 20 tarik Ïaïong 2023.
Ha kane ka jingjurip u CEM u la phah khang ïa ki bym don laisen khaïi la ki dei kiba shong madan ne kiba shong dukan.
N na ka liang ki pulit ka KHADC ruh ki la pahara jur bad shim ïa ka bynta ban peit ïa ki kot ki sla bad khang ïa ki dukan.
Ha kane ka sngi la synranlang u Syiem ka Hima Mylliem u Pa’iem Ainam Syiem ryngkat ki myntri ka hima.
Haba ïakren bad u Bah Titos Chyne, u la ong ba kane ka jingkhynra ka long ban peit ïa ki dukan bar jylla ba ki dei ban ïoh laisen khaïi namar ym lah ban bat suloi khlem pat don laisen ne u nongñiah kali um lah ban ñiah ïa ka kali khlem laisen.
Nalor kata, u la ong nangne shakhmat u Syiem ka Hima Mylliem bad ka KHADC kin ïatreilang ban peit bniah ïa ki dukan bar jylla kiba shong die madan khlem laisen khaïi.
Shuh shuh u la pynpaw ïa ka jingsngewkmen haba u ïohi ïa ki para Khasi kiba la sdang ban shong ha ki madan ki lynti syngkien namar ma ki ruh ki donkam ban pyndap jakpoh.
Kumta na ka liang u Bah Titos un sa phah shithi sha kito ki dukan ki bym pat don laisen khaïi khnang ba kim lah ban wan khaïi khlem kot khlem sla.
