Washington, Iaiong:
Ki pulit ka US ha ka Sngi Balang, ki la ioh kem noh ia 2 ngut ki khynnah bad la pynngat ia ki hapoh ki kyndon jong ka aiñ haba iadei bad ka jingkhlad jong 4 ngut bad 32 ngut kiba mynsaw na ka jingsiat ha ka jingïaleh kmen ban rakhe ia ka jingdap 16 snem hapoh ka shnong Alabama ha ki taiew ba la leit.
La ong ba ka jingjur ki kam siat bad synreit kuli ha US ka la long shaba palat ha kine ki sngi mynta bad nalor kane, ki dang don sa bun tylli ki jingjia synreit kuli ha kylleng ki bynta jong ka United States kiba ju jia man la ka sngi.
Ka Alabama Law Enforcement Agency (ALEA) ka la pynithuh ia kitei ki suba don kti ha katei ka jingjia, kum u Ty Reik McCullough (17 snem ka rta) bad u Travis McCullough (16 snem) bad la pynngat ruh ia ki hapoh jong 4 tylli ki kyndon jong ka jingpyniap briew.
Kitei ki 2 ngut ki dei na Tuskegee, ka shnong kaba jngai kumba 30 mile (48 kilometre) na South Dadeville.
Watla kitei kiba don kit ki dang dei ki khynnah namar ka rta jongki ka dang rit, hynrei la ong ba yn hap pat ban shim da ki kyndon jong kiba la heh namar ka jingleh jongki ka la long palat ia ka aiñ bad kumta la hap ban pynshitom ia ki katkum ki kyndon aiñ ba la buh.
Ki bor pyniaid ki la ong ba, ka kamram jongki ka long ban pynthikna ba baroh kitei kiba la mynsaw bad kumjuh ruh ki bahaiing jong kito kiba khlad, ba ki dei ban ioh ia ka hok jongki bad kumta ym lah ban pyllait ia kine ki 2 ngut watla ki dang dei kiba hapoh ka 18 snem ka rta.
La ong ba ki bor pyniaid bad ki heh jong katei ka thaiñ ki la shah kynthoh bad ka la mih ka jingpyrshah na ki paidbah hadien ba kim shym lah ban ai jingpynshai halor ka jinglong jingman haba iadei bad katei ka jingjia da ki katto katne sngi, kynthup naduh ka jinglong jingman jong kiba don kti, la ki la lait phet, ki la kyllon iap lane ne em ruh ha katei ka jingjia.
Watla katta, la ong ba ki bor pyniaid ha kitei ki sngi ba la jia katei ka jingjia, kim shym la ai jingtip eiei halor kitei kiba don kti ha katei ka jingsiat bad la shu pyntip ba kitei kiba ngat bad mynsaw ha katei ka jingjia ki dei ki khynnah kiba dang ha ki khat’ baroh namar katei ka jingleh kmen ha katei ka iing, ka dei ka sngi rakhe ia ka jingdap 16 snem.
