Bengaluru, ïaïong:
Kawei na ki nongialehkai iakob mareh kaba na ri Scotland ka Joasia Zakrzewski ka la shah sloit noh na ka jingwan balai ha ka Ultra-Marathon hadien ba ka jinglum jingtip kaba bniah ka pyni ba katei ka nong-ialehkai ka la pyndonkam da ka kali kum shi bynta ban shim kabu ha katei ka jingiakob mareh.
Shuh shuh ka khubor ka iathuh ruh ba ka jinglum jingtip na ka Tracking System ha ka GB Ultras Manchester sha Liverpool 80km Race ha ka 7 tarik mynta u bnai, ka pyni ba katei ka nongialehkai kaba lah mihkhmat ia ka ri Scotland ha ka jingialehkai Marathon ha ka 2014 Commonwealth Games ha Glasgow, ka la pyndonkam da ka kali na ka bynta ki 4km jingjrong ha ka jingiakob mareh.
Hynrei katkum ka jingiathuh kiwei pat ki khubor ka long ba ka paralok ba iamarehlang bad ka, ka iathuh ba ka lah kem pang kynsan bad kwah ban leit buh ia ka hadien ka jingwan na Australia ha ka miet shuwa ban long katei ka jingiakob mareh.
Kumta ka lah pynlong ia ka tei ka nong-ialehkai ban pyndonkam da ka kali ha kata ka lynti ba dei ban mareh ha ka step ba bud jong ka jingiakhun.
