Shillong, Ïaïong 21:
Ki kot ki sla jong u kyrtong ka United Democratic Party (UDP), u Bah Synshar Lyngdoh Thabah ki long kiba biang hadien ba la dep peit bniah na ka bynta ban ïakhun ïa ka ilekshon MLA ha Sohïong konstitwensi. Ka jingthep vote ha katei konstitwensi kan long ha ka 10 tarik Jymmang bad ka jingñiew vote ha ka 13 tarik Jymmang.
Ïa ka jingpeit bniah ïa ki kot ki sla tang jong u kyrtong ka UDP la leh ha ka sngi Thohdieng ha shlem treikam u Deputy Commissioner, East Khasi Hills district.
Namarba ka ilekshon ha Sohïong konstitwensi ka dei kaba la pynsangeh namar ka jingkhlad u Bah HDR Lyngdoh uba long u kyrtong ka UDP, ka jingpeit bniah ïa ki kot ki sla la leh tang ïa ki kot thep kyrteng jong u kyrtong ka UDP u Bah Synshar.
Ki kot ki sla jong kiwei pat ki kyrtong ki la biang lut namar la dep peit bniah kham mynshwa ha u Rymphang ha ka sngi ba peit bniah ïa ki kot thep kyrteng.
Ka tarik khatduh ïa u kyrtong ka UDP ban weng kyrteng lada um kwah shuh ban ïakhun ka dei ha ka 24 tarik mynta u Ïaïong.
Kiwei pat ki kyrtong ki bym donkam shuh ban thep kyrteng thymmai namar ki la dep mynshwa, bad ki la biang lut ki kot ki sla, ki kynthup ïa u MLA barim bad u kyrtong ka NPP, u Bah Samlin Malngiang, u kyrtong ka Congress u Bah S Osborne Kharjana, u Bah Sandondor Ryntathiang u kyrtong ka HSPDP, u Bah Seraph Eric Kharbuki u kyrtong ka BJP, bad u Bah Stodingstar Thabah u kyrtong ka All India Trinamool Congress (AITC).
Ha ka jingshisha, ka jingthep vote ha Sohïong ka dei ban long ha 27 tarik Rymphang mynta u snem lem bad ki 59 tylli kiwei pat ki konstitwensi, hynrei ka Election Commission ka la pynsangeh noh namar ka jingkhlad u Bah HDR Lyngdoh kum u kyrtong ka UDP ha ka 20 tarik Rymphang, 2023.
