Jowai, Ïaïong 21:
Ka Lion Sports Youth Affairs ka la khur jingjop da 16 run pyrshah ïa ka Khimmusniang Sports Club ha ka jingïalehkai kriket ba la tip kum ka “Open to All Cricket Tournament 2023”.
Ïa kane ka lympung ïalehkai la pynïaid da ka West Jaiñtia Hills District Cricket Association Jowai ha madan Khliehtyrshi Mini Stadium ha ka sngi Thohdieng.
Ha shwa ban sdang ka jingïalehkai ka Lion Sports Youth Affairs ka la jop kynting pisa bad ka la kam trai shwa ban tied nyngkong ha kaba ka la kamai 213 run bad shah pynhap 6 wiket ha ki 35 over. U Nik Dan u la tied 46 run na ki 44 bol, u Kitboklang Rangad u la ïoh 42 run na ki 41 bol bad u Firstbornson Dkhar u la ïoh 43 run na ki 45 bol.
Na ka liang ki nongkawang bol ka Khimmusniang Sports Club, u Chwamiki Ryngkhlem u la pynhap 2 wiket na ki 7 over bad u Richard Patwet u la pynhap 2 wiket na ki 7 over.
Haba wan beh ïa ka thong, ka Khimmusniang Sports Club ka la lah ban kamai tang 197 run na ki 35 over bad shah pynhap 9 wiket. U Chwamiki Ryngkhlem u la tied 85 run na ki 68 bol bad u Richard Patwet u la la ïoh 27 run na ki 27 bol.
Na ka liang ki nongkawang bol ka Lion Sports Youth Affair, u Peterson Lamare bad u Namewanki Pakynteiñ ki la khur mar 2 wicket na ki 7 over.
Ïa ka nam Man of the Match la ïoh da u Firstbornson Dkhar jong ka Lion Sports Youth Affairs.
