Shillong, Ïaïong 21:
U Chief Secretary ka jylla, u Bah DP Wahlang, ha ka Sngi Thohdieng u la ong ba ha Meghalaya kam ju kham don ka jingïakynad hapdeng ki babu sorkar bad ki riew saiñpyrthei.
Ïa kane, u Bah Wahlang u la kren ha ka jingïalang ban rakhe ïa ka National Civil Services Day kaba 16 lane ka sngi jong ki babu sorkar ha ka jingdonlang u Myntri Rangbah Conrad K Sangma bad ki babu sorkar.
U Bah Wahlang u la ong ba ha kine ki khyndiat snem, ki babu sorkar ki la shah kynthoh ha kiba bun rukom bad ka la dei ka por ïa ki babu sorkar ba kin pynlong ïa ka jingpuson ban wad ïa ki daw kiba wanrah ïa ki jingshah kynthoh.
U Chief Secretary u la kren ruh halor ka jingïadei hapdeng ki babu sorkar bad ki paidbah, bad ki babu sorkar bad ki riew saiñpyrthei. “Ngi long kiba donbok ban trei ha ka jylla kum ka Meghalaya namar ki ‘riew saiñpyrthei (Political Executive) ki kham pher haba ïanujor bad kiwei pat kiba don ha kiwei ki jylla namar kam ju kham don ka jingïakynad ne ka jingïashrut hapdeng ki ‘riew saiñpyrthei bad ki babu sorkar.”
Na ka liang u Bah Wahlang u la kyntu ïa ki babu sorkar ba kin pynleit jingmut ha ki kam kiba la bynshet ha ki. “Ka long kaba donkam ban pynleit jingmut bad ban pyndep hok ïa ki kam ki jam khlem da iehnoh shiteng por. Dei ban pynthikna ba ki kam ki jam ki dei ban long na ka bynta ka jingmyntoi jong baroh ki nongshong shnong. Lada ngim lah ban leh kumta ka mut ngi khlem pat pyndep hok ïa ka kamram,” u la ong.
U Chief Secretary u la ai jingmut ba dei ban don da ka kynja khusnam ha ka jylla ba la tip kum ka Civil Service Award kumba buh ka Sorkar Pdeng da ka National Civil Service Award.
