Spain, ïaïong:
Katkum ka khubor ba la ioh lum ka iathuh ba na ka liang jong u khlur ialehkai Tennis ka ri Spain u Rafael Nadal u la pynpaw ba un sa duh noh ban shim bynta ha ka lympung ialehkai Madrid Masters. Kane ka wan hadien ba utei u rangialehkai u dang hap ban iai bteng shah sumar na ka jingmynsaw. Da katei ka jingbym shym lah ia shim bynta ha ka lympung, kan long ruh ka jingduh kaba khraw ha ka jingpynkhreh na ka bynta ban ia aireng ha ka French Open.
Shuh shuh u lah pynpaw ruh ba ia mynta u lah duh noh ruh ha ka ban shimbynta ha ka Monte Carlo bad Barcelona Open bad ruh uba lah thikna ba un ym lah ban shimbynta ha ka lympung ialehkai kaba mynta ka Madrid Masters ruh kumjuh. Kumba lah pynpaw biang mynta ka long ba u Nadal um shym lah ialehkai shuh naduh ba u lah shah pynrem ha ka kylla iakhun kaba ar jong ka Australian Open mynta u snem kaba lah long ha kaba sdang jong une u snem ba mynta kata ha u K’lyngkot.
Kumba ka long mynta, u Nadal u don ia ka jingkyrmen ka bynta ban khur ia ka rekod jingjop ba 15 na ka French Open ha u bnai Jymmang, hynrei katei ka jingmynsaw ka jong u kaba u lah ioh naduh ka jing-iakhun ha ka Aus Open, khlem pep ka lah pynthut ia ka jingiaid lynti ialehkai ka jong mynta u snem.
U long ruh u rangialehkai uba lah weng noh ialade na ka lympung iakhun ha hard-court ka Indian Wells bad Miami ruh kumjuh, ha ryngkat bad ka jingphaikhmat mynta na ka bynta ban pynkhreh ialade ha ka ban wanphai biang sha ka kam ialehkai ha kaba sdang jong ka aiom ialehkai ki lympung ha madan khyndew-saw, hynrei kaba kata ruh kam shym la seisoh satia ha u.
Ka jingialeh ka jong u na ka bynta ban ioh ia ka koit ka khiah bapura ha ka met ka lah nang jur bad kylla long ka mat kaba hakhmat eh na ka bynta ki kam ialehkai ki jong u naduh ba u lah ioh ban rah ia ka khet jingjop ba 14 na ka French Open ha u snem ba lah dep.
Shuh shuh ruh ha ka lympung ialehkai Wimbledon jong ka samoi ialehkai ba lah dep, u Nadal u lah shah pynbor na ka bynta ban weng noh ialade na ka jingiakhun semifinal ka jong u namar ka jingshitom kynsan ha ka kpoh. Ka khubor ba mynta ka iathuh ruh ba ka lympung ialehkai French Open jong une u snem ba mynta kan long ha ka 28 tarik u Jymmang.
