Christina S. Mairom
Ka Ri Khasi baieid jong ngi kaba dap da ka jingkyrkhu ka mariang ba itynnad bad ba iphuh iphieng ka lah sdang ban duh noh ia kata ka jingitynnad ha kine ki khyndiat snem ba la leit. Dang myn ha ka 14 tarik u Iaiong 2023, ka la don ka jingjia kaba sngewsih na ka jingtwa khyndew ha ka surok bah Shillong-Dawki ha Rngain, Pynursla haduh ba ki 2 ngut ki mynsiem briew ki lah shu duh noh bad 9 ngut ki lah mynsaw jur. Ka daw ka long na ka jingtih khlemakor bad beaiñ ia ki mawbah kaba la pynsynjor ia katei ka jaka. Kat kum ki jingtip ba la lum na ki paidbah kiba don ha katei ka jaka, ki lah iathuh ba ka ARSS Infrastructure Projects Ltd. kompeni, kaba dei khmih ia katei ka jingshna surok ka la aiti ia katei ka kam khlong maw, ha ki ar, lai ngut ki nongialam Sengbhalang kiba ki khlem shym la jer kyrteng.
Shuh shuh, lah ioh jingtip ruh ba kam dei satia ka sien nyngkong ba katei ka Kompeni ba ka don ha ka kam khaii maw hynrei ha ka lyiur ba ladep ruh, kham harum katei ka jaka, kaba twa mynta la ju don ka jingshah ban jong ki ar, lai tylli ki kali, namar ka jingtuid khyndew ka ju jia khah khah khamtam ha ka por lyiur bad ka daw bah ka dei ba ki kontraktor lane ki trai jaka, ki sei tang ia u maw ban ioh ban die shawei pat bad kim shym pynkhuid thikna kumba ka donkam ha ka por ban tih ia ki surok.
Ka jingkylli ia ngi ki paidbah ka long ba hato mano ba ai bor ia ki ban tih beaiñ pylleiñ pylleiñ bad sa katno kin pynjulor ia ka mariang ? Ka jingtih beaiñ ia ki maw, ka jingtong ia u shyiap, jingtih ia ki mar poh khyndew ka nang iaid haduh mynta watla bun ki kyndon bad ki aiñ ba lah pynmih na ka por sha ka por ban teh lakam ia ki hynrei ym i don jingmyntoi.
Ia ki maw na lum bunsien la shah pynpra katkum ka jingdonkam jong ki briew shimet.Kane ka long kawei na ki daw ba kongsan kaba pynjulor ia ka mei mariang tang namar ka jingrhah bad khwan myntoi da ki katto katne ngut ki briew. Ka Mei Mariang ka lah kyrkhu ia ka Ri Khasi jongngi shikatdei eh, ka jingkyrkhu kaba la shu shah pyndonkam bakla kaba pynkylla long pynban ka daw ka jingpynjulor haduh ba ka lawei ban wan ka don ha ka jingma ba khraw.
Kumta ngi kyntu ia ki ba dei khmih ia kane ba ki dei ban sngewthuh ba ka lah donkam ba kin pyrkhat jngai na ka bynta ka lawei bad ym dei ban ailad ba ka mariang kan shah bynda.Donkam ban iada ia ka, khnang ba ka Lawei jongngi kan im.
