Bertina Lyngdoh
Ha lynti ki iaid khlem jingkhuslai, ha man la ki kynta bad shaduh ka lashai, bad kumne ki ia iaid ter ter ki sngi. Kim don ka shatri ne kino kino ki jingiada na ka jingshit kyrang ka sngi, naba slap un jaw, bad ba lyer ka beh, hynrei ki pynkloi ki pynsted sha la ki kam ki jam bad kumjuh ruh ban leit phai sha la ki iing. La marwei ne ar, bad la uba bun ruh, kine ki iai im hapneh ka meimariang. Haba sngi u Trai ka wan, ki da leit tista sha la ki iingmane, lem bad ka Baibl ne ka kot na ka ktien u Blei, kaba khlem khuslai ia kat kaba ka mariang ka long. Ynda mynmiet pat, na jingthait ki iohthiah lyngngai bad ha ka jingkynoi ka suinbneng ki jah noh ha ki jingphohsniew. Katno ka jingisuk haba peit iaki, ba kumne ki im hapneh ka meimariang.
Baroh ngi ieit ia ka mariang, hynrei kane ka jingieit mariang ka pher na iwei sha iwei pat. Don kiba ieit bad burom ia ka mariang, katba don pat kiba shu ieit ym ba burom ia ka. Uba ieit ba burom ia ka mariang ne ka jingkylla ha ka suinbneng, um ju thnum, u hun ia kat kaba ka long. U hun u suk khlem jingkhuslai la slap, la lyer, bad la shit ne khriat. Ha kine ki sngi, ngi la mad ia ka jingshit kaba kham pher na u snem bala leit noh. Bun, uba la ud, ba balei kumne ka shit tasam. Bun ruh, uba la ap bad khmih lynti ba lano u slap un hap. Kane ka jinglynga ka pynpaw ba briew hi lano lano ruh um ju hun bad ba ki jingkwah jong u ruh kim ju kut. Lada ioh, u nang iai kwah, lada ym ioh ruh, um long ban duh. Te kumta, haba don ka jingkylla ha ka mariang, kumta te ngi khnium. Haba ka mariang kam lah shuh ban pynhun ia u khunbynriew, hato kam dei mo ba ngi kum ki briew kiba im ha ka mariang, ngi la pynduhjait noh ia ki jingthaw ba im ka ma-riang kum ki dieng ki siej kiba long ka jaka rieh bad jingpyntngen na u slap ka sngi. Haba phai sha ki thain nongkyndong, dang lah ban shem ia ki dieng ki siej kiba long ka jingtngen ia u khunbynriew khamtam ha ba don ka jingkylla ha ka suinbneng. Katba ha sor pat, la bun sa tang ki jingtei kum shibynta ban pynheh pyniar ia ka roi ka par, kum ki jaka pule, ki ophis treikam, ki dukan heh bad rit, bad kiwei kiwei de.
Kumta, uba ieit hi ia ka mariang, la kan don ka jingkylla haka ruh, um ud um nam hynrei u iai im hi haka. Wat la syep ka jaw haba u leit u wan, um salia bad u iai pyndep hi la ka sngi. Kum uta u briew, jynjar ban shem bad lehseh um don shuh hi ruh. To ki bynriew, to tip ba ka ri Khasi ka dei ka ri kaba pyngngad bad ba ka jinglong jingman ka suinbneng ruh, ka dang bha bad kaba dang ban iai shah haba ia nujor bad kiwei pat ki jylla ka ri India. Wat lada ka la kham jur ha ka jingshit jingkhriat ruh, u khunbynriew um da jynjar ne iap thala kum ha kiwei ki jaka kylleng ka ri India. Kumta, lada ka Mariang ka don la ka por jong ka kumjuh ruh u briew. Burom bad ieit iaka Mariang, kumba ngi ieit bad burom ialade ne ia kito kiba jan tam sha ngi. Wat pynjulor iaka Mariang, namar ynda ka suinbneng ka mariang ka kylla, uba kham jynjar hi dei mangi u briew.
