Shillong, Ïaïong 21:
Ki saw tylli ki ïing ba don ha Nongmensong ba shna da ka tnat Pynroi Sor jong ka sorkar jylla na ka bynta ban pynsah ïa ki longïing ba duk ki la sdang ban kylla ktem awria. Kane ka dei namar ka jingsah khongreng jong kine ki ïing mynta la hynriew snem eiei na bym shym lah bynta sha ki longïing kiba dei ban ïoh ïa ka bhah.
Ha ka jingjurip u nonglum khubor la ïohi ba ki ar tylli ki ïing paki dulan kiba la dep shna lut nadong shadong ki la shu sah khongreng bad man rim biang namar ki ïit ki la pait lut, ka phyllaw la bun ba sop da ki phlang, ki bilor ba la pait, ki ñiut ki ñier bad ki maw kiba la wan bret ha ki kamra.
Kine ki ïing ki don kumba saw tylli eiei, hynrei namar bym pat lah ban sam sha ki 40 tylli ki longïing ka la pynlong ba kin shu pra bad jaboh kai da ka jingwan shongkai ki briew ha ka por mynmiet ban leh ïa ki kam sniew ba laiphew jait.
Nalor kine ki saw tylli ki ïing kiba la dep ban shna da ka tnat Pynroi Sor, ki dang don sa phra tylli kiwei pat kiba la shu ieh bad pynïeng tang ki païa bad tap slep khlem da lah ban ker ne pyndep.
Kane ka jingsah khongreng ki ïing baduk ha Nongmensong ka la pynlong ïa ki briew ban leh ïa ki kam sniew bad pynjaboh.
Na kawei ka ïing kaba la dep shna dei ban pynrung haduh 16 tylli ki longïing baduk kiba dei trai shnong na Nongmensong, Pynthor bad Laitumkhrah.
Kum ban shu pynkynmaw ïa kine ki ïing baduk la sam nyngkong ha u snem 2013 bad haduh mynta ki don 19 tylli ki ïing kiba la dep shna ba thmu bynta sha 304 tylli ki longïing ba kin ïoh shong.
Nalor kata, la ïoh jingtip ba ki la don ki longïing baduk kiba la sah ha kane ka ïing ba pynshna da ka sorkar, hynrei da la ïoh thied jaka lajong ki mih noh.
Kumta na ka liang ki bor shnong bad ki pulit ki ju leit swait man ka por ha kitei ki ïing baduk ban lait na ka jingshim kabu ki briew da kaba leh ïa ki kam awria bad kiwei kiwei.
