Shillong, Ïaïong 21:
U MLA ka United Democratic Party (UDP) na Nongpoh, u Bah Mayralborn Syiem u la ïaroh ïa ka Sorkar MDA-I kaba la shim ïa ka sienjam ban pynbeit pud ha ka wat banyngkong, hynrei ha ka synshar paidbah kan don beit ka jingwohnia namar ym lah ban pynhun lut shispah na ka shispah.
Hynrei u la ong ruh ba ban khmih biang ïa ka soskular sngewthuh jingmut (MoU) kaba la soi hapdeng ki ar tylli ki Jylla ban pynbeit pud ka dang don bha ka lad namar ba ka Parliament kam pat shim ïa ka rai kaba khatduh.
U la ong ba kum kaba donlang ha ka Sorkar MDA-II, ka long ruh kaba donkam ban phaikhmat sha ka Common Minimum Programme (CMP) ha kaba ki mat kular ilekshon jong ki seng bapher bapher kin rung lang ha ka mat treikam na ka bynta ban pynïaid ïa ki kam shakhmat.
Haba kylli kumno ka UDP kan leh namar ka Sorkar kham mynshwa ka la ong ba ym lah phaidien shuh ïa MoU, u Bah Mayralborn u la ong ba ka por kan sa batai namar ka saiñ hima kaba kylla.
Nalor kata, u la kubur ba ki don ki jingbymhun na katto katne halor ka jingpynbeit pud ha ka wat banyngkong, hynrei ka Regional Committee jong ka Sorkar ka la pyrshang katba lah ban leh. Hynrei, kane ka kam ka dei ka bym lah ban pynhun 100 na ka 100 bad ha kaba kut ka Sorkar ka hap ban shim ïa ka rai.
Nangta u la ong shuh shuh ba ka Sorkar ka donkam ban shim katkum ka para 20 jong ka Sixth Schedule ka Riti Synshar haba ïadei bad ki jaka khappud.
Namar kata, u la ong ba u sngewlem ba ki Regional Committee kin sa sdang biang ïa ki kam halor ka jingpynbeit pud ha ka wat ba-ar.
