Nongstoiñ, Ïaïong 21:
Ka lympung ïalehkai 28th Chief Minister District Level Inter School Athletic meet 2023 ïa kaba la pynlong da ka shlem trei kam jong ka District Sports Officer (DSO), West Khasi Hills ka la poi sha kaba kut ha ka sngi Thohdieng ha kaba ka skul St. Peter Higher Secondary School, Pyndengrei ka la ïoh ban khur ïa ka nam lahduh.
Kane ka nam jop ka la wan urlong hadien ba ka ïoh khur ïa ka nam Best Team ha ka liang ki khynnah shynrang bad kynthei napdeng ki 26 tylli ki skul kiba la wan ban ïashim bynta mynta u snem.
Ïa ka nam Best Athletes ha ka Under-14 ki shynrang la ïoh ban khur da u Bobinchal Wanñiang na ka St. Peters Higher Secondary School bad ka Phibapynsuk K. Jana na ka Anderson Higher Secondary School.
Ha ka Under-16 la ïoh ban khur da u Nicky Mawsor na ka Anderson Higher Secondary School bad ka Tresha Nongbri na ka Sib Singh Memorial Govt Higher Secondary School. Katba ha ka Under-18 la ïoh ban khur da u Shaipharlin Nongsiej bad ka Albamary Sohshang kiba dei na St. Peter’s Higher Secondary School.
Ïa ka nam Best March-Past la ïoh ban khur da ka JNV Nongstoiñ.
Kum ban shu kdew hangne ki la don haduh 1002 ngut ki khynnah kiba wan shim bynta ha ki lai tylli ki kyrdan ïalehkai jong kane ka lympung, kita ka Under-14, Under-16 bad Under-18 na ki 26 tylli ki skul.
Ha katei ka sngi ka Kong B. Blah, ADC West Khasi Hills ka la long kum ka kongsan ha ka jingdonlang ka Kong L. Syiem, District School Education jong ka West Khasi Hills, u Bah P.B. War Nongbri, Asst. Director ka tnat ïalehkai, ka Kong Balarina Syiem, District Sports Officer jong ka West Khasi Hills bad kiwei kiwei kiba la sam ruh ïa ki khusnam bapher bapher.
