Aizawl, Ïaïong:
Ha ka sngi Balang jong kane ka taïew kaba mynta la ïoh jingtip ba ki la don haduh 5 ngut ki koidi kiba la lait phet na kawei ka patok jong ka jylla Mizoram. Kat kum ki jingïoh lum khubor la ïathuh ba kitei ki 5 ngut ki koidi ki la lait phet na Lunglei District Jail ha ka step phyrngab jong ka sngi Balang mynta ka taïew.
Kat ku ki jingïoh lum jingtip la ïathuh ruh ba napdeng ki 5 ngut kiba la leit phet na katei ka patok ki kynthup ruh ïa ki runar kiba la shah kem bad shah set na ka daw jong ka jingdonkti ha ki kam pynïap briew; katba 2 ngut kiwei pat ki dei ki runar kiba la shah kem na ka daw jong ka jingdonkti jong ki ha ki mokotduma jong ka NDPS Act.
Tat haduh ba la ïoh ïa kane ka knubor, la ïathuh ba na ka liang ki bor pulit jong ka jylla ki la sdang ban pynlong ïa ki jingtohkit kiba bniah khnang ban ïoh kem biang ïa kitei ki runar kiba la lait phet.
Ki 5 ngut ki runar kiba la lait phet na katei ka patok ki kynthup ïa u Lalbawihliana (27 snem ka rta), Dokapthang (26), Haudeihchhin (25), u Vanneihthanga (38) & Vanlalduati (24).
