Na Tirap shah kem u nongïalam jong ka NSCN (K-YA)

Longding, Ïaïong:

Ki bor pahara ka Longding battalion jong ka tnat shipai Assam Rifles ha ryngkat ka jingïatreilang bad ki bor pulit jong ka thaiñ Tirap ha ka miet jong ka 17 bad 18 tarik mynta u bnai ki la lei ban pynlong ïa ka jingkhynra kaba jur bad ïoh ruh ban kem ïa uwei u nongïalam jong ka seng kieng atiar NSCN (K-YA).

Kat kum ki jingïoh lum khubor la ïathuh ba u dkhot jong ka NSCN (K-YA) u ba la shah kem ha katei ka sngi u dei u ba la tip kyrteng kum u Wangbet Wangjen – u dkhot jong ka seng u ba bat ïa ka kyrdan kum u rajapio ha ka thaiñ Kanubari – u ba ju donkti ha ki kam dawa pisa beaiñ ha ki shnong bapher bapher jong ka thaiñ Longding District.

Kat kum ka jingïathuh jong ki bor pulit, ki la pyntip ruh ba dang ha u bnai Jymmang jong u snem 2022, utei u runar u la don bynta ha ka kam beaiñ ban rahbor ïa u nongïalam shnong ka thaiñ Laukxim, Kanubari namar ka jingdonkit jong u ban ïaleh pyrshah ïa ki jingbthah jong ka seng. Halor katei ka jingjia sha rahbor jong u tei u nongïalam shnong la ïathuh ba na ka liang ki nongshong shnong ka thaiñ ki la pynlong ruh da ka jingïakhih kaba jur ha ka 9 tarik u Jymmang, 2022.

Hadien ka jingshah kem jong u Wangbet la ïoh jingtip ba ïa u la set phatok noh na ka bynta ban pynlong ïa ki jingtohkit kiba dang sah.