Shillong, Ïaïong 21:
U khun shynrang jong u Bah HDR Lyngdoh (Bam Kwai ha Dwar U Blei) u Bah Nathaniel Rymmai, u la pynpaw ba um sngew ba u kpa jong u, u la khlad hynrei u sngew kumba u dang leit ïalap ilekshon ban ïakynduh ïa ki paidbah ka Sohïong konstitwensi namar u dei uba ieid bha ïa ki paidbah.
Haba ïakren kyrpang bad u Bah Nathaniel Rymmai, u la ïathuh ba ha kane ka ilekshon ka ban sa long ha ka 10 tarik Jymmang, 2023 ka long kumba ïakhun hi u kpa jong u (Bah HDR Lyngdoh).
“Nga kyrmen ba i Pa in don ryngkat bad u Bah Pup namar u dei uba la ïarap ïa ki paidbah namar ki don kiba la ïaleh pyrshah, hynrei shwa ba in khlad ki la wan ban kyrshan ïa i Pa” u la ong.
Nangta u la ïathuh ba u kpa um ju pang, hynrei u shitom tang ar kynta shwa ba in khlad na kane ka pyrthei namar barabor u shait leit sha hospital tangba mar shu dih dawai u la mih noh.
“Shisien ba u kyrtong u la mih ha madan ngim dei ban kheiñ sting lada dei ïano ïano namar ka la jia teng ha kiwei ki konstitwensi kaba ki kheiñ sting ki jop pynban bad nga don jingkyrmen ba u Bah Synshar Lyngdoh uba dei u kyrtong ka UDP u la dep pynkhreh bha” u la ong.
Nalor kata, u la batai ba ha ka por ba u kpa um long MLA shuh, hynrei ki paidbah ki dang wan beit ban ïakynduh. Pynban kaba phylla ka long ba lada uno uno u briew uba la dom bha, hynrei mar shu thap met u kpa ki la jem noh ka mynsiem.
“Ha kane ka juk kaba mynta ngan nym ïohi shuh ba ki nongmihkhmat kin ieid ïa ki paidbah namar wat ban plie ‘account’ ki wan ban ïawer ban leit lang. Kumta i Pa i shait ong ïa nga wat nym leh mar khaïi ïa ka kam shakri paidbah namar ka dei ka kam kaba shakri ïa U Blei” u la ong.
U Bah Nathaniel u la pynpaw ba ïa mynta kumba la pynbeit ha ïing u hun beit ban ïakhun u Bah Synshar Lyngdoh uba dei u pyrsa jong u kpa, hynrei ïa mynta um pat lah ban batai la u kwah ne em ban bteng ïa ka kam shakri paidbah namar mynta u dang bun kam lajong.
U la pynshai ruh ba u kpa u la kren jingïalang haduh shi kynta eiei ha Mawmaram hadien ba u la shong hapoh kali u sngew kumba sat ka shadem bad ynda la rah sha hospital la ïoh jingtip ba u la khlad noh.
