Paris, ïaïong:
Ka Modern Pentathlon (MP) ka la kylla long mynta ka jingialehkai Olympic kaba thymmai ha ka ban pynbna paidbah mynta ia ka jingpdiang sngewbha biang ka jong ka sa shisien ia ki nong-ialehkai ka ri Russia bad Belarus kiba la shah khang baroh shi katta ba shimbynta ha kino kino ki jingialehkai.
Kumta ka shlem treikam ba ha khliehduh jong ki jingialehkai (UIPM) ka pynbna ba ka Executive Committee ka lah ai ka jingkyrshan na ka bynta ban weng noh ia ka jingbym shah shimbynta ki nong-ialehkai jong kitei ki ar ri hadien ba ka ri Russia ka lah leit ban hiar thma pyrshah ia ka Ukraine ha u Rymphang 2022.
Naba katei ka jingiai thombor ka ri Russia ia ka Ukraine ka lah nangiar bad jankot mynta sha u snem ba-ar, kumta na ka liang jong ka International Olympic Committee (IOC) ka lah ai jingmut bad mynjur ruh ha ka ban shah ia ki nongialehkai na kitei ki ar ri ba kin ia iareng kum kita ki nongialehkai-pdeng (Neutrals Athletes) ha ki lympung ialehkai bar-ri ki ban dang wan.
Kumta ruh na ka liang jong ka UIPM ka kyrshan ia katei ka jingplie-lad-plie-lynti sha kita ki nongialehkai jong kitei ki ri kum ki nongialehkai-pdeng bad ba laitluid, ha ryngkat bad ka jingpynithuh (Passports) ba ki dei kiba na Russia bad Belarus bad na ka bynta ban shah ia ki nongialehkai jong baroh ki ri ba kin ia airrenglang kum kawei ka iing-ka-sem ha ki kam ialehkai jong ki, khamtam eh ha kaba mynta ka don ha ka jngiaid lynti na ka bynta ban shah jied sha ka Olympic 2024.
Ka Modern Pentathlon ka iai bud ia ki dienjat jong ka jingialehkai Fencing, Table Tennis, Taekwondo bad Triathlon kiba baroh kitei ki jingialehkai ki lah mynjur bad pdiang mynta ia ka jingwanphai ki nongialehkai jong kitei ki ar sha ki kam ialehkai jong ki. Hynrei ki jingialehkai Athletics bad Equestrian ki dang iai pynsah haduh mynta ia ka jingkhang jong ki ban ym shah ia ki nongialehkai jong kitei ki ri ban shimbynta ha kino kino ki lympung ialehkai.
