Ka Harijan Panchayat Committee (HPC) ka la pynpaw ïa ka jingpyneh ba kam kwah satia ban pyndem ha ka jingbyrngem jong ka sorkar ban pynkynriah noh ïa kiba shong ba sah ha Them Ïew Mawlong sha ki shlem ba la pynkhreh. Ka jingpyneh jong ka HPC ka la wan na u Secretary jong ka, u Gurjit Singh, uba la takraiñ tyngeh ïa kane ka sorkar. Ka HPC ka la kynnoh ba ka saiñdur ba la ai da ka sorkar ha kaba ïadei bad ki jaka ban pynsah ïa kito kiba don ha Them Ïew Mawlong ka long kaba dang don jingduna, ka bym biang, ka bym don ka jingleh hok bad kaba long pyrshah ïa ki nongshong ha kane ka jaka. Khlem jingriej, kane ka kynhun kaba mihkhmat ïa kiba shong ba sah ha Them Ïew Mawlong ka la pynpaw ruh ba naduh ba la wan ka sorkar bathymmai, ki Myntri Sorkar, ki MLA bad sa ki katto katne ki kynhun, ki la kren lap lah da kaba ong ba yn pyndep ïa ki kam ki jam kiba ïadei bad ka jingpynkynriah ïa kiba sah ha Them Ïew Mawlong hapoh u bnai Ïaïong.
Kine ki jingkynthoh bad jingkynnoh na ka HPC ki pyni ba lehse kan ym long kaba suk ban pynkynriah ïa kiba sah ha Them Ïew Mawlong. Ka HPC ka la kam beit ba ka jaka ha Them Ïew Mawlong kam dei satia jong ka sorkar jylla, hynrei jong u Syiem ka Hima Mylliem. Na ki jingkynthoh jong ka HPC, ka long kaba shai kdar ba kam kwah satia ba kiba shong ba sah ha Them Ïew Mawlong kin shah pynkynriah shawei kumba la angnud bad saiñdur da ka sorkar. Lehse kin dang hap ban don biang ki jingïakren kiba kham sani hapdeng ka HPC bad ka High-Level Committee khnang ba kan don ka lad ban pynkut noh ïa kane ka mat. Ban shu ïa pyneh sah baroh arliang mamla kan ym ïalam shano-shano. Hap ban ïathir bha khnang ban lait na kano-kano kaba sniew.
Kane ka mat ka dei kaba la slem bah bad na kawei ka sorkar sha kawei pat ka la don ka jingpyrshang ban pynkynriah ïa kiba sah ha Them Ïew Mawlong sha ki ïing sorkar. Hynrei haduh mynta ym pat don satia kiba lah ban pynkohnguh ïa kine ki briew ba kin mih noh na kane ka jaka. Ha u bnai Ïaïong jong u snem ba la dep, na ka liang ka HPC ka la buh syndon da ki kyndon sha ka High-Level Committee bad kita ki long: Dei ban ai da ka jaka jong ka sorkar na ka bynta ban pynsah lang ïa 342 tylli ki longïing ki ban shah pynkynriah na Them Ïew Mawlong; ba ka khyndew ba don 10 Acre ka dei ban don hapoh u pud u sam jong ka European Ward (ha kaba ka Sixth Schedule lane ki kyndon ka Khyrnit Ba Hynriew kim treikam); ban ai mar 200 square metre ka jaka ha kata ka khyndew ha European Ward ïa man ki 342 tylli ki longïing; ban ai pisa ïa kine ki longïing ba kin shna hi ïa la ki ïing; ban ailad ba ïa ki ïing ba la shna yn lah ban pyndonkam pateng la pateng. Ha kaba ïadei bad ka jingdawa ban ai jaka sorkar, ka sorkar jylla ka la mynjur.
Haduh mynta, ka HPC ka dang bat beit ïa kitei ki kyndon kiba ka la buh shi snem mynshwa. Kam dei kaba suk ïa ka sorkar ba kan ai jingmynjur ïa kitei ki kyndon namar kan hap ban pyrkhat shaei kan ïalam lada shu kohnguh lut kat kaba dawa kiba sah ha Them Ïew Mawlong. Lada ka kohnguh, kan hap ban pynkhreh ban kohnguh sa na ka bynta kiwei pat kiba lah ban mih hadien habud. Namarkata, ngi ïai ban biang ïa kajuh bad kata ka long ban bteng ïa ka jingïakren khnang ban poi sha ka jingïasngewthuh jingmut. Ka HPC bad ka sorkar kim dei ban ïa pyni dohksah khlem nongrim namar kan sa wanrah ïa ka jingsniew. Ka lad ka don beit ban ïakren bad ban poi sha ka jingïasngewthuh lada ka don ka mon kaba skhem.
Sa tang shi bnai tam, ka jingjia kaba la sdang ha ka janmiet jong ka 31 tarik Jymmang, 2018, kan dap san snem kynthih. Ngi kynmaw ba ka la don ka jingïakhih kaba shyrkhei ha Shillong hadien ba la mih ka jingïakynad ha Them Ïew Mawlong. Ka la don ka jingpynjari korphiw bad ka jingkawang maw ha Motphran bad ki jaka ba marjan. Na ka liang ka HPC ka la kynnoh ba da kaba shim kabu na kane ka jingjia kaba rit, ka la mih pynban ka jingdawa ban pynkynriah ïa kiba sah ha Them Ïew Mawlong tang ban ïoh phoida ha ki kam saiñpyrthei. La jan dap san snem naduh ba ka jingdawa ban pynkynriah ïa kiba sah ha Them Ïew Mawlong ka la khie im biang, bad haduh mynta kam i poi shano-shano ruh. Ngim tip sa katno kan shimpor ban pynbeit ïa kane ka kam kaba la sahteng da ki phew snem.
