Barcelona, ïaïong:
Ha ka lympung ialehkai tennis kaba dang iaid mynta shakhmat ka Barcelona Open, ka khubor ba la ioh lum ka iathuh ba u Carlos Alcaraz uba dang iai bat kum u lahduh, u la lah ban ialehkai bha wat hapdeng ka jingbeh jur jong ka lyer na ka bynta ban jam sha ka rynsan iakhun quarterfinal. Kane ka wan hadien ba utei u rangialehkai u la lah ban khur noh shalade ia ki 6-3, 7-5 jingjop pyrshah ia u nongialehkai na kajuh ka ri (Spain) u Roberto Bautista Agut.
Nalor kata ha katei ka lympung ialehkai, u Stefanos Tsitsipas ruh u lah jam sha katei kajuh ka rynsan iakhun hadien ka jinglah ban pynrem noh ia u Denis Shapovalov da 6-3, 6-2; katba u Casper Ruud u lah shah pynrem noh ha u Francisco Cerúndolo da 7-6 (5), 6-3. Haba phai khyndiat sha ka jingiakhun u Alcaraz ka long ba u tei u rangialehkai u lah shah pynkhein dor-thong shisien ha ka set iakhun ba nyng-kong bad arsien ha ka set iakhun kaba ar, hynrei uba dang lah pat ban teh lakam ia ka jingialehkai jong u tad haduh ban da pyndep ia ka jingiakhun baroh kawei da ka jingjop, ha ryngkat bad ki11 dor-thong kiba u lah khur ha kaba khatduh. Ka long ruh ka sien jop kaba arsien lynter ha baroh shi lynter ki set iakhun ba u Alcaraz u la lah ban khur shalade, ha kaba utei u rangialehkai u ialeh na ka bynta ban long uba nyngkong ha ka jingiai-ban biang ka jong u sa shisien kum u lahduh ha katei ka lympung ialehkai naduh ba u Rafael Nadal u lah khur ia ki lai sien jingjop lynter kata naduh u snem 2016-18.
Kumta hadien katei ka jingjop u Alcaraz ha ka jing-iaknieh rung semifinal, uwei pat u rangiakhun pyrshah jong u u ban iaknieh rung sha ka phainal un sa uwei pat u rangialehkai na Spain kata u Alejandro Davidovich Fokina; uba lah pynliem noh ia u Emil Ruusuvuori da 6-4, 7-5. Ha kawei pat ka jingialehkai, u Stefanos Tsitsipas u la lah ban pyllait-im ia baroh ar ki jingshah pynkhein dor-thong kiba u lah mad na u rangiakhun pyrshah u Denis Shapovalov na ka bynta ban jam sha ka 18-5 jingjop na bynta ka aiom ialehkai ba mynta. Kumta ruh hadien katei ka jingjop, u Tsitsipas un iakynduh sa bad u Alex de Minaur; uba lah ioh rung sha ka rynsan da ka w/o kaba u lah ioh na u Grigor Dimitrov. Ka long ruh ka sien kaba san ha kaba u Tsitsipas u ioh ban mih madan ha ka lympung hadien ka jingdep ban shah rem ha ka phainal ha u Nadal ha u snem 2018 bad 2021.
Ha kawei pat ka jingialehkai, u Casper Ruud uba lah mih sha ka madan ialehkai ha ka lympung ha ryngkat bad ka jingialehkai ka jong u na ka bynta ban khur ia ka jingjop ha Estoril, u lah shah pynliem noh ha u Cerúndolo bad ka jingshah kyntait ia ka jingmih madan ha ka sien kaba ar ha ka rynsan iakhun quarterfinal ha ka lympung. Kumta u Cerundolo hadien katei ka jingjop un hap ban iakynduh sa bad u Daniel Evans; uba lah pynliem noh ia u Karen Khachanov da 6-3, 6-4. Ka jingialehkai u Jannik Sinner ha kaba nyngkong ka lah pynduh jingkyrmen ia u, hynrei uba la lah pat ban khyllie ia ki jingshah pynkhein dor-thong na ka bynta ban pynliem noh ia u Yoshihito Nishioka da 6-1, 4-6, 6-3 bad uba lah jam mynta sha ka jingiakhun quarterfinal kaba hynniew sien jong ka aiom ialehkai ka jong u bad u ban pynkhreh sa na ka bynta ka jing-iakhun pyrshah bad u Lorenzo Musetti; uba la lah ban pynliem noh ia u Cameron Norrie da 3-6, 6-4, 6-1.
