Shillong, Ïaïong 21:
Ka Khasi Students’ Union (KSU) ka la ong ba ka Sorkar kam dei ban pynlong khun khatduh ïa ki briew kiba shong ba sah ha Them Ïew Mawlong, hynrei ka dei ban pyndonkam la ka iktiar bad jubab da ki kam khnang ban pynurlong ïa ka jingdawa jong ki paidbah babun balang.
Ka Harijan Panchayat Committee (HPC) ha ka Sngi Palei ka la ther kylla ïa ka Sorkar Jylla ha kaba ïadei bad ka saiñdur ban pynkynriah ïa kiba shong ba sah ha Them Ïew Mawlong, bad ka la ong ba kane ka saiñdur ka long kaba dang don jingduna, ka bym biang, ka bym don ka jingleh hok bad kaba long pyrshah ïa ki nongshong shnong ha katei ka jaka.
“Kine ki briew ki pyrshang ban pyni bor pyrshah ïa ka Sorkar. Ka shong mynta sa ha ka Sorkar ïa ka kamram ba ka dei ban leh. Lada ngi ïakren ba hangto ki don kiba sah bad trei ha Shillong Municipal Board bad ha kiwei-kiwei ki tnad treikam la ka long jong ka Sorkar Jylla ne Sorkar Pdeng, kumno ki shakri Sorkar ki lah ban pyni bor kylla ïa ka Sorkar…katba phah ka Sorkar ban leit sah, kin hap leit,” la ong u President ka KSU, samla Lambokstarwell Marngar ha ka Sngi Thohdieng da kaba bynrap ba kitei ki briew ki don ka jingsngew khraw wat ïa ka Sorkar.
U la ong ba lait na ki nongtrei Sorkar, ïa kiba tam ym dei ban ïakren namar la sngewthuh ba bun kiba shong be-aiñ bad kim don hok ruh ba ka Sorkar kan ai jaka ïa ki.
“Ka shong ha ka Sorkar ïa kaei ba ka dei ban leh nangne shakhmat, ban pynurlong ïa ka jingdawa bad jingkhmih lynti jong u paidbah. Kita ki rukom kiba ka Sorkar ka la ïaid, la pyndep lut nadong shadong bad kumba ka paw, ki shu ap sa tang ïa ka por ba ka Sorkar kan leh ïa kaba donkam,” u la ong.
Ka seng ka la kren shai ba ka Sorkar kam lah ban pynlong khun khatduh ïa ki briew kiba sah ha Them Ïew Mawlong.
Haba kdew ba ka Sorkar ka dei ban pyndonkam ïa la ka iktiar kumjuh ïa u shabuk jong ka, u samla Marngar u la ong ba katei ka jaka ka la wanrah ka jingkhapngiah, ka jingbym khuid bym suba, ki jingsniew bapher-bapher bad khamtam ka jingbym shong shngaiñ wat ïa ki Khasi kiba ïaid ba ïeng na katei ka jaka.
“Kane ka mat ka dei kaba la slem, ngi hap ban sngewthuh ba ka Sorkar mynta ka la poi ha ka bynta ba kan ïaid shakhmat bad ngi ngeit ba ka Sorkar kan jubab da ki kam khnang ba u paidbah un hun ban ïohi ba ka Sorkar ka leh ïa kaba dei ban leh,” u la ong.
Shuh shuh u President u la bynrap, “Ngi khmih lynti ba ka Sorkar kan leh ïa kaba donkam bad ngim kwah ba kine kijuh ki briew kin pyni ïa ka bor ba ki kham long halor ban ïa ka Sorkar.”
